രജനികാന്തിനെ നായകനാക്കി നെൽസൺ ദിലീപ് കുമാർ സംവിധാനം ചെയ്ത ‘ജെയിലർ’ തമിഴ് സിനിമകളുടെ എല്ലാ കളക്ഷൻ റെക്കോർഡുകളും ഭേദിച്ച് മുന്നേറുകയാണ്.
സിനിമയിൽ പശ്ചാത്തല സംഗീതത്തിന്റെ പ്രാധാന്യം വളരെ വലുതായിരുന്നു. രജനിയുടെയും മോഹൻലാലിന്റെയും വിനായകന്റെയും രംഗങ്ങൾക്ക് അനിരുദ്ധ് രവിചന്ദർ ഒരുക്കിയ പശ്ചാത്തല സംഗീതത്തിന് തിയേറ്ററുകൾ ഇളകി മറിഞ്ഞിരുന്നു.
ചിത്രത്തിന്റെ വിജയത്തിൽ രജനിക്കും സംവിധായകൻ നെൽസണും ആഡംബര കാറുകളും ചെക്കുകളും കലാനിധി മാരൻ സമ്മാനമായി നല്കിയിരുന്നു. ഇപ്പോഴിതാ സംഗീത സംവിധായകൻ അനിരുദ്ധിനും സമ്മാനം നല്കിയിരിക്കുകയാണ് കലാനിധി മാരൻ.
രജനിക്കും നെൽസണും നൽകിയ പോലെ ഇഷ്ടപ്പെട്ട കാറുകൾ തെരഞ്ഞെടുക്കാൻ മൂന്ന് ഓപ്ഷനുകൾ അനിരുദ്ധിനും ലഭിച്ചു. ബി. എം. ഡബ്ലിയുവിന്റെ രണ്ട് കാറുകളും പോർഷെയുടെ ഒരു കാറുമാണ് അനിരുദ്ധിന് മുൻപിൽ വെച്ചത്, ഇതിൽ പോർഷെയുടെ കാറാണ് അനിരുദ്ധ് തെരഞ്ഞെടുത്തത്.
1.44 കോടി വിലവരുന്ന പോർഷെയുടെ മക്കാൻ എസ് എന്ന് മോഡലായിരുന്നു നെൽസൺ തെരഞ്ഞെടുത്തത്, അതേ സമയം 1.24 കോടി വില വരുന്ന ബി. എം ഡബ്ലിയു എക്സ് 7 ആണ് രജനികാന്ത് തെരഞ്ഞെടുത്തത്.
ഇനി അടുത്ത സമ്മാനം ആർക്കായിരിക്കും,കേരളത്തിലേക്ക് സമ്മാനവുമായി കലാനിധി മാരൻ എത്തുമോ എന്ന കാത്തിരിപ്പിലാണ് പ്രേക്ഷകർ.