കൃഷ്ണകുമാറിന്റെ കനത്ത തോല്‍വിയ്ക്ക് പിന്നാലെ തന്നെ പരിഹസിച്ച് ചോദ്യം ചെയ്തയാള്‍ക്ക് തക്കതായ മറുപടി കൊടുത്ത് നടി അഹാന കൃഷ്ണ. ‘അച്ഛന്‍ പൊട്ടിയല്ലോ’ മെസേജ് ആണ് അഹാനയ്ക്ക് ലഭിച്ചത്. ഒറ്റവാക്കില്‍ ആയിരുന്നു അഹാനയുടെ മറുപടി. ‘അയിന്’ എന്നാണ് അഹാന ചോദിച്ചത്.
നേരത്തെ അച്ഛന്റെ സ്ഥാനാര്‍ഥിത്വത്തില്‍ സന്തോഷമുണ്ടെന്നും മകള്‍ എന്ന നിലയിലാണ് താന്‍ അച്ഛനെ പിന്തുണയ്ക്കുന്നതെന്നും അഹാന പറഞ്ഞിരുന്നു. നടി എന്ന നിലയിലോ രാഷ്ട്രീയം നോക്കിയോ അല്ല തന്റെ തീരുമാനമെന്നും താരം വ്യക്തമാക്കിയിരുന്നു.
ലോക്‌സഭ തിരഞ്ഞെടുപ്പില്‍ കൊല്ലത്ത് നിന്നുള്ള ബിജെപി സ്ഥാനാര്‍ഥിയായാണ് നടന്‍ കൃഷ്ണകുമാര്‍ മത്സരിച്ചത്. കൊല്ലത്ത് എന്‍.കെ പ്രേമചന്ദ്രന്‍ വിജയിച്ചപ്പോള്‍ ഇടത് സ്ഥാനാര്‍ഥിയായ മുകേഷ് രണ്ടാം സ്ഥാനത്തും ബിജെപി സ്ഥാനാര്‍ഥിയായ കൃഷ്ണകുമാര്‍ മൂന്നാം സ്ഥാനത്തുമാണ് എത്തിയത്.
കൃഷ്ണകുമാര്‍ തോറ്റതോടെ സോഷ്യല്‍ മീഡിയയില്‍ വലിയ രീതിയിലുള്ള ട്രോളുകളാണ് വരുന്നത്. തിരഞ്ഞെടുപ്പ് പ്രചാരണങ്ങളില്‍ കൃഷ്ണകുമാറിന് പിന്തുണയുമായി ഭാര്യ സിന്ധുവും അഹാന ഉള്‍പ്പടെയുള്ള നാല് മക്കളും ഉണ്ടായിരുന്നു. കൃഷ്ണകുമാര്‍ പരാജയപ്പെട്ടതോടെ കുടുംബത്തിനെതിരെ പരിഹാസങ്ങളും ഉയരുന്നുണ്ട്.