മികച്ച സിനിമകള്‍ക്കുള്ള ദേശീയ ചലച്ചിത്ര പുരസ്‌കാരം ഇന്ന് പ്രഖ്യാപിക്കും. ഡല്‍ഹിയില്‍ വൈകീട്ട് അഞ്ച് മണിയോടെയാണ് പ്രഖ്യാപനം നടക്കുക. മലയാളത്തില്‍ നിന്നും ‘നായാട്ട്’, ‘മിന്നല്‍ മുരളി’, ‘മേപ്പടിയാന്‍’ തുടങ്ങിയ ചിത്രങ്ങള്‍ വിവിധ വിഭാഗങ്ങളില്‍ അവാര്‍ഡിന് പരിഗണനയിലുണ്ട് എന്നാണ് റിപ്പോര്‍ട്ടുകള്‍.
ആര്‍ മാധവന്‍ സംവിധാനം ചെയ്ത് അഭിനയിച്ച ‘റോക്കട്രി’ മികച്ച നടന്‍ അടക്കം വിവിധ വിഭാഗങ്ങളില്‍ മികച്ച പ്രകടനം കാഴ്ചവയ്ക്കുന്നുണ്ട്. നായാട്ട് എന്ന ചിത്രത്തിലെ അഭിനയത്തിന് ജോജു ജോര്‍ജ് മികച്ച നടനുള്ള സാധ്യത പട്ടികയില്‍ ഉണ്ടെന്നാണ് വിവരം.
മികച്ച നടിക്ക് വേണ്ടിയുള്ള മത്സരത്തില്‍ ആലിയ ഭട്ടും, കങ്കണ റണാവത്തും തമ്മിലാണ് മത്സരം എന്നാണ് സൂചന ‘ഗംഗുഭായ് കത്ത്യവാഡി’ എന്ന ചിത്രത്തിലെ അഭിനയത്തിനാണ് ആലിയയ്ക്ക് സാധ്യത. ‘തലൈവി’ എന്ന ചിത്രത്തിലെ പ്രകടനമാണ് കങ്കണയ്ക്ക് സാധ്യത നല്‍കുന്നത്.
എസ്.എസ് രാജമൗലിയുടെ അന്താരാഷ്ട്ര തലത്തില്‍ ശ്രദ്ധിക്കപ്പെട്ട ‘ആര്‍ആര്‍ആര്‍’ ചിത്രത്തിലെ സംഗീതത്തിന് കീരവാണിക്ക് മികച്ച സംഗീത സംവിധാനത്തിനുള്ള അവാര്‍ഡിന് സാധ്യതയുണ്ട്. മലയാളത്തില്‍ നിന്നും മിന്നല്‍ മുരളിക്കും ചില അവാര്‍ഡുകള്‍ക്ക് സാധ്യതയുണ്ട്.
