മുഹമ്മദ് മുസ്തഫ സംവിധാനം ചെയ്യുന്ന മുറയിലെ ശ്രീനാഥ് ഭാസ് ആലപിച്ച ഗാനം ഫഹദ് ഫാസില്‍ റിലീസ് ചെയ്തു. തന്റെ സോഷ്യല്‍ മീഡിയ പ്ലാറ്റ് ഫോമുകളിലൂടെയാണ് ഫഹദ് ഗാനം പുറത്തിറക്കിയത്. മുറ ചിത്രത്തിന്റെ ടീസറിനും ടൈറ്റില്‍ സോങിനും പിന്നാലെയാണ് ശ്രീനാഥ് ഭാസി ആലപിച്ച നൂലില്ലാ കറക്കം എന്ന ഗാനം പുറത്തിറക്കിയിരിക്കുന്നത്.
വിനായക് ശശികുമാര്‍ രചന നിര്‍വഹിച്ച ഗാനത്തിന്റെ സംഗീത സംവിധാനം ക്രിസ്റ്റി ജോബിയാണ്. കപ്പേളക്ക് ശേഷം മുഹമ്മദ് മുസ്തഫ സംവിധാനം ചെയ്യുന്ന ചിത്രം ‘മുറ’ ഉടന്‍ തിയേറ്ററുകളിലേക്കെത്തും. സുരാജ് വെഞ്ഞാറമൂടും, ക്യാന്‍ ഫിലിം ഫെസ്റ്റിവലില്‍ അവാര്‍ഡ് നേടിയ ആള്‍ വീ ഇമാജിന്‍ ആസ് ലൈറ്റ്, തഗ്‌സ്,മുംബൈക്കാര്‍ തുടങ്ങിയ ചിത്രങ്ങളിലെ കേന്ദ്ര കഥാപാത്രത്തെ അവതരിപ്പിച്ച ഹ്രിദ്ധു ഹാറൂണുമാണ് മുറയില്‍ പ്രധാന വേഷങ്ങളിലെത്തുന്നത്.
മാലാ പാര്‍വതി, കനി കുസൃതി, കണ്ണന്‍ നായര്‍, ജോബിന്‍ ദാസ്, അനുജിത് കണ്ണന്‍, യെദു കൃഷ്ണാ,വിഘ്നേശ്വര്‍ സുരേഷ്, കൃഷ് ഹസ്സന്‍, സിബി ജോസഫ് എന്നിവരാണ് മുറയിലെ പ്രധാന കഥാപാത്രങ്ങളെ അവതരിപ്പിക്കുന്നത്. മുറയുടെ രചന നിര്‍വഹിക്കുന്നത് ഉപ്പും മുളകും ഫെയിം സുരേഷ് ബാബുവാണ്.
റിയാ ഷിബു,എച്ച് ആര്‍ പിക്‌ചേഴ്‌സ് എന്നിവരാണ് ചിത്രത്തിന്റെ നിര്‍മ്മാണം. ഫാസില്‍ നാസര്‍ ഛായാഗ്രഹണം നിര്‍വഹിക്കുന്ന ചിത്രത്തിന്റെ എഡിറ്റിംഗ് ചമന്‍ ചാക്കോയാണ്.
