ഭരണകൂട ഭീകരതയെ കുറിച്ചാണ് വെട്രിമാരന്‍ ചിത്രം ‘വിടുതലൈ’ പറഞ്ഞത്. സൂരിയും വിജയ് സേതുപതിയും കേന്ദ്ര കഥാപാത്രങ്ങളായ ചിത്രം ഏറെ ശ്രദ്ധ നേടിയിരുന്നു. ചിത്രത്തിന്റെ രണ്ടാം ഭാഗവും എത്താന്‍ ഒരുങ്ങുകയാണ്. 2023 മാര്‍ച്ച് 31ന് ആണ് വിടുതലൈയുടെ ആദ്യ ഭാഗം തിയേറ്ററുകളിലെത്തിയത്.
ചിത്രത്തിന്റെ രണ്ടാം ഭാഗത്തിനായി കാത്തിരിക്കുകയാണ് ആരാധകര്‍. രണ്ടാം ഭാഗത്തില്‍ നടി മഞ്ജു വാര്യരും അഭിനയിക്കുന്നുണ്ട്. ചിത്രത്തെ കുറിച്ച് വിജയ് സേതുപതി പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്. തന്റെ കഥാപാത്രമായ വാത്തിയാര്‍ക്ക് ഒരു ലവ് ട്രാക്ക് സംവിധായകന്‍ വെട്രിമാരന്‍ പ്ലാന്‍ ചെയ്തിട്ടുണ്ട് എന്നാണ് സേതുപതി പറയുന്നത്.
തനിക്കും മഞ്ജു വാര്യര്‍ക്കും ഇടയിലാണ് റൊമാന്റിക് ട്രാക്ക് സംഭവിക്കുക. ചിത്രത്തിന്റെ ഫൈനല്‍ കട്ടില്‍ ഈ ഭാഗങ്ങള്‍ എഡിറ്റ് ചെയ്ത് കളയരുതെന്ന് വെട്രിമാരനോട് താന്‍ പ്രത്യേകം പറഞ്ഞിട്ടുണ്ടെന്നും വിജയ് സേതുപതി ഒരു അഭിമുഖത്തില്‍ വ്യക്തമാക്കി. അതേസമയം, ചിത്രത്തിന്റെ രണ്ടു ഭാഗങ്ങളും റോട്ടര്‍ഡാം ഇന്റര്‍നാഷണല്‍ ഫിലിം ഫെസ്റ്റിവലിലേക്ക് തിരഞ്ഞെടുത്തിരുന്നു.
റോട്ടര്‍ഡാം ഫിലിം ഫെസ്റ്റിവലില്‍ തന്നെയായിരിക്കും ചിത്രത്തിന്റെ രണ്ടാം ഭാഗത്തിന്റെ ആദ്യ പ്രദര്‍ശനം. പ്രശസ്ത തമിഴ്- മലയാളം നോവലിസ്റ്റ് ബി. ജയമോഹന്റെ തുനൈവന്‍ എന്ന ചെറുകഥയെ ആസ്പദമാക്കിയാണ് ചിത്രമൊരുക്കിയത്. ജയമോഹനും വെട്രിമാരനും ചേര്‍ന്നാണ് ചിത്രത്തിന് തിരക്കഥയെഴുതിയത്.
ഇളയരാജയാണ് ചിത്രത്തിന് സംഗീത സംവിധാനം നിര്‍വഹിച്ചിരിക്കുന്നത്. വാത്തിയാര്‍ എന്നറിയപ്പെടുന്ന പെരുമാള്‍ എന്ന മാവോയിസ്റ്റ് നേതാവിനെ പിടികൂടാനായി തദ്ദേശീയ ജനവിഭാഗങ്ങളായ ആദിവാസികള്‍ക്കെതിരെ ഭരണകൂടം നടത്തുന്ന അതിക്രമങ്ങളും, പുതുതായി പൊലീസ് സേനയില്‍ ചേര്‍ന്ന യുവാവിന്റെ മാനസിക സംഘര്‍ഷങ്ങളുമാണ് വിടുതലൈ ആദ്യ ഭാഗത്തില്‍ ചര്‍ച്ച ചെയ്തത്.