തെന്നിന്ത്യൻ സിനിമയിൽ നായകനും പ്രതിനായകനുമായി തിളങ്ങി, ബോളിവുഡിൽ വരെ എത്തിനിൽക്കുന്ന താരമാണ് വിജയ് സേതുപതി. ലോക്സഭാ തിരഞ്ഞെടുപ്പ് അടുത്ത നിൽക്കെ, മുൻപ് വിജയ് സേതുപതി ആർക്ക് വോട്ട് ചെയ്യണമെന്ന് പറയുന്നൊരു വീഡിയോയാണ് ഇപ്പോൾ സോഷ്യൽ മീഡിയയിൽ വൈറലായികൊണ്ടിരിക്കുന്നത്.
നമ്മുടെ മതം അപകടത്തിലാണെന്ന് പറഞ്ഞുകൊണ്ട് വോട്ട് ചോദിക്കുന്നവർക്ക് ഒരിക്കലും വോട്ട് നൽകരുതെന്നാണ് വിജയ് സേതുപതി പറയുന്നത്. നിരവധി പേരാണ് ഇപ്പോൾ ഈ വീഡിയോ പങ്കുവെച്ചുകൊണ്ടിരിക്കുന്നത്. വർഗ്ഗീയ ധ്രുവീകരണം നടത്തുന്ന ബിജെപിയെയും സംഘപരിവാറിനെയും ഉദ്ദേശിച്ചാണ് വിജയ് സേതുപതി ഇത്തരമൊരു പ്രസ്താവന നടത്തിയത് എന്നാണ് വീഡിയോയ്ക്ക് വരുന്ന കമന്റുകൾ.
വോട്ട് ചെയ്യുകയെന്നത് വളരെ പ്രധാനപ്പെട്ട കാര്യമാണെന്നും, നല്ലപോലെ ചിന്തിച്ച് ചെയ്യണമെന്നും പറഞ്ഞ വിജയ് സേതുപതി, നമ്മുടെ ജാതിക്കും മതത്തിനും പ്രശ്നമുണ്ട് എന്ന് പറഞ്ഞ് വോട്ട് ചോദിക്കുന്നവരുടെ കൂടെ നിൽക്കരുതെന്നും കൂട്ടിച്ചേർത്തു.
“ഇന്ത്യയിലെ എന്റെ സ്നേഹമുള്ള ജനങ്ങളേ, നിങ്ങൾ സൂക്ഷിച്ച് വോട്ടുചെയ്യണം. ദയവായി നല്ലവണ്ണം ചിന്തിച്ച് വോട്ടുചെയ്യണം. വോട്ടുചെയ്യുകയെന്നത് പരമപ്രധാനമാണ്. നമ്മുടെ സംസ്ഥാനത്തോ ഗ്രാമത്തിലോ കോളജിലോ അല്ലെങ്കിൽ ഒരു സുഹൃത്തിനോ എന്തെങ്കിലും പ്രശ്നമുണ്ടെങ്കിൽ അതു പരിഹരിക്കാൻ രംഗത്തിറങ്ങുന്നവരെയായിരിക്കണം എപ്പോഴും സഹായിക്കേണ്ടത്.
അല്ലാതെ, നമ്മുടെ ജാതിക്കും മതത്തിനും പ്രശ്നമുണ്ടെന്ന് പറഞ്ഞ് വോട്ടുചോദിക്കുന്നവർക്കൊപ്പം ഒരിക്കലും ഒപ്പം നിൽക്കരുത്. അങ്ങനെ പറയുന്നവരൊക്കെ നമ്മളെ കുഴപ്പങ്ങളുണ്ടാക്കാൻ പ്രേരിപ്പിച്ച് ഇളക്കിവിട്ടശേഷം അവരുടെ വീട്ടിൽ പൊലീസ് സംരക്ഷണയിൽ സുരക്ഷിതമായി കഴിയുന്നവരായിരിക്കും. നമ്മളായിരിക്കും പിന്നീട് കുഴപ്പത്തിലാവുക. ഇത് എല്ലാവരും മനസ്സിലാക്കണം.” എന്നാണ് വിജയ് സേതുപതി മുൻപൊരു ചടങ്ങിനിടെ പറഞ്ഞത്.