ഒടുവില് തനിക്ക് ചിരിക്കാന് പറ്റിയൊരു റോള് കിട്ടിയെന്ന് നടന് സുദേവ് നായര്. വൈശാഖ്-മോഹന്ലാല് കൂട്ടുകെട്ടില് എത്തുന്ന ‘മോണ്സ്റ്റര്’ ചിത്രത്തെ കുറിച്ചുള്ള വിശേഷങ്ങള് പങ്കുവച്ചാണ് സുദേവ് സംസാരിച്ചത്. മോഹന്ലാലിനൊപ്പം അഭിനയിക്കാന് സാധിച്ചത് ഭാഗ്യമെന്നും സുദേവ് സോഷ്യല് മീഡിയയില് കുറിച്ചിട്ടുണ്ട്.
”മോഹന്ലാല് സാറിന്റെ കൂടെ അഭിനയിക്കണം എന്നത് എന്റെ ചെറുപ്പകാലം മുതലുളള ആഗ്രഹമായിരുന്നു. അത് എനിക്ക് ഈ സിനിമയിലൂടെ സാധിച്ചു. വൈശാഖിനെ പോലൊരു നല്ല ഡയറക്ടര്, ഉദയകൃഷ്ണയുടെ സ്ക്രിപ്റ്റ് ഇത്രയും അനുഭവ സമ്പന്നരായ ആളുകളുടെ കൂടെ പ്രവര്ത്തിക്കാന് കഴിഞ്ഞു.”
”ഒരു ബമ്പര് ലോട്ടറി അടിച്ച ഫീലാണ് എനിക്കിപ്പോള്. ഞാന് ചെയ്യുന്ന കഥാപാത്രം എനിക്കിതു വരെ കിട്ടാത്ത ഒന്നാണ്. അങ്ങനെ പല പല അവസരങ്ങള് എനിക്ക് ഈ സിനിമയിലൂടെ കിട്ടിയിട്ടുണ്ട്. സിനിമ വളരെയധികം ട്വിസ്റ്റുകള് ഉള്ളൊരു ത്രില്ലര് റൈഡ് ആയിരിക്കും” എന്നാണ് സുദേവ് സോഷ്യല് മീഡിയയില് പങ്കുവച്ച വീഡിയോയില് പറയുന്നത്.
‘ഒടുവില് എനിക്ക് ചിരിക്കാന് സാധിക്കുന്ന ഒരു വേഷം ചെയ്യാന് സാധിച്ചു’ എന്ന് കുറിച്ചു കൊണ്ടാണ് സുദേവ് വീഡിയോ പങ്കുവച്ചത്. ഒക്ടോബര് 21-ന് ആണ് മോണ്സ്റ്റര് റിലീസ് ചെയ്യുന്നത്. ലക്കി സിംഗ് എന്ന വളരെ വ്യത്യസ്തമായ ഒരു കഥാപാത്രത്തെയാണ് മോഹന്ലാല് ചിത്രത്തില് അവതരിപ്പിക്കുന്നത്.