തന്നെ അസഭ്യം പറഞ്ഞയാളെ സഹോദരി അക്ഷര ഇടിച്ചൊതുക്കിയെന്ന് നടി ശ്രുതി ഹാസന്. മോശമായി പെരുമാറുന്നവരോട് താന് സംസാരിച്ചാണ് പ്രതികരിക്കാറുള്ളത്. എന്നാല് അക്ഷര അവരെ ശാരീരികമായി നേരിടും എന്നാണ് ശ്രുതി ഹസന് ഇപ്പോള് തുറന്നു പറഞ്ഞിരിക്കുന്നത്.
താന് വാക്കുകള് കൊണ്ടാണ് മോശമായി പെരുമാറുന്നവരോട് പ്രതികരിക്കുന്നത്. എന്നാല് സഹോദരി അക്ഷര ഇത്തരക്കാരെ ശാരീരികമായി നേരിടാന് പ്രാപ്തയാണ്. ഒരിക്കല് തന്നോട് വളരെ മോശമായ ഭാഷയില് ഒരാള് സംസാരിച്ചു. സെക്കന്ഡുകള്ക്കുള്ളില് അയാളുടെ ഉച്ചത്തിലുള്ള നിലവിളിയാണ് കേട്ടത്.
നോക്കുമ്പോള് അക്ഷര അയാളെ പിന്നില് നിന്ന് ഇടിച്ചുകൊണ്ട് ‘എന്റെ സഹോദരിയെ അങ്ങനെ വിളിക്കാന് നിനക്ക് എങ്ങനെ ധൈര്യം വന്നു’ എന്ന് ചോദിക്കുന്ന കാഴ്ചയാണ് കണ്ടത്. താന് ഇടപെട്ട് അക്ഷരയെ പിടിച്ചു മാറ്റുകയായിരുന്നു എന്നാണ് ശ്രുതി പറയുന്നത്.
കമല്ഹാസന്റെ മക്കള് എന്നതിലുപരി ശ്രുതി ഹാസനും അക്ഷര ഹാസനും സിനിമാ ലോകത്ത് തങ്ങളുടെതായ വ്യക്തിമുദ്ര പതിപ്പിച്ചിട്ടുണ്ട്. തെന്നിന്ത്യയില് മാത്രമല്ല ബോളിവുഡിലും ഇരുവരും ഹിറ്റ് ചിത്രങ്ങളില് അഭിനയിച്ചിട്ടുണ്ട്.
അതേസമയം, ‘സലാര്’, ‘വാല്ട്ടയര് വീരയ്യ’ എന്നീ തെലുങ്ക് സിനിമകളും നന്ദമൂരി ബാലകൃഷ്ണയ്ക്കൊപ്പമുള്ള സിനിമയുമാണ് ശ്രുതിയുടെതായി ചിത്രീകരണം നടക്കുന്നത്. ‘അഗ്നി സിറകുകള്’ എന്ന തമിഴ് ചിത്രമാണ് അക്ഷര ഹാസന്റെതായി അണിയറയില് ഒരുങ്ങിക്കൊണ്ടിരിക്കുന്നത്.