കാലാപാനി, എന്ന സിനിമയിയുടെ ചിത്രീകരണ സമയത്തുണ്ടായ രസകരമായ അനുഭവങ്ങള് പങ്കുവെച്ച് സംവിധായകനും ഛായാഗ്രാഹകനുമായ സന്തോഷ് ശിവന്.
ഒരു സീനില് ആദിവാസി സ്ത്രീ മോഹന്ലാലിനെ അടിക്കുന്ന സീനുണ്ടെന്നും ആ സ്ത്രീ അത് റിയലായി തന്നെ ചെയ്തെന്നും സന്തോഷ് ശിവന് പറയുന്നു. ആ സ്ത്രീ ഒന്ന് ചിരിച്ചിട്ട് ഒറ്റയടി വച്ചു കൊടുത്തു. അതൊരു ഒന്നൊന്നര അടിയായിരുന്നു.
ഞാന് കണ്ടതില് ഏറ്റവും റിയലായ അടിയാണ്. ഈയ്യടുത്ത് ലാല് സാറിനെ കണ്ടപ്പോള് ഞാന് ചോദിച്ചു, ആ അടി ഓര്മ്മയുണ്ടോ എന്ന്. ഉണ്ട് ഉണ്ട് നന്നായി ഓര്ക്കുന്നുണ്ടെന്ന് പറഞ്ഞു. അവര് നന്നായിട്ട് തന്നെ അടിച്ചു. മീന് പിടിക്കുന്ന കൈ അല്ലേ, അത് വച്ച് നല്ല ഒരെണ്ണം കൊടുത്തു. അത് സിനിമയിലുണ്ട്. അദ്ദേഹം പറഞ്ഞു.
കാലാപാനി ചെയ്യുമ്പോള് ഞങ്ങള് ഞെട്ടിയ പല സംഭവമുണ്ടായിട്ടുണ്ട്. സാബു സിറിലാണ് ആര്ട്ട്സ്. ആര്ട്ട് ചെയ്യാനുള്ള പ്രോപ്പര്ട്ടിയൊക്കെ കൊണ്ടു വരുന്ന കപ്പല് ഞങ്ങളുടെ മുന്നില് വച്ച് കത്തിപ്പോയി. മുഴുവന് കത്തി ഇല്ലാതായി.
അവസാനം എല്ലാം നമ്മള് സ്വന്തമായി ഉണ്ടാക്കേണ്ടിവന്നു. ആന്ഡാമാനിലേക്ക് ഞങ്ങള് കുതിരയെ കൊണ്ടു പോയപ്പോഴാണ് അവര് ആദ്യമായി കുതിരയെ കാണുന്നത്. അവസാനം കുതിരയെ തിരികെ കൊണ്ടു വരാന് സമ്മതിച്ചില്ല. അദ്ദേഹം കൂട്ടിച്ചേര്ത്തു.