നാദിര്ഷ ഒരുക്കുന്ന സിനിമകള് ഒഴിവാക്കിയതിനെ കുറിച്ച് തുറന്നു പറഞ്ഞ് സലിം കുമാര്. തനിക്ക് നന്നായി വിശ്രമിക്കണം, ആസ്വദിക്കണം എന്നാണ് നാദിര്ഷയോട് പറഞ്ഞതായും അത് അവന് മനസ്സിലാക്കാന് സാധിക്കും എന്നാണ് സലിം കുമാര് ബിഹൈന്ഡ്വുഡ്സിന് നല്കിയ അഭിമുഖത്തില് പറയുന്നത്.
തന്നെ സിനിമയിലേക്ക് ഉന്തി തള്ളി കൊണ്ടു വന്ന ആളാണ് നാദിര്ഷ. അവന്റെ രണ്ട് ചിത്രങ്ങള് താന് ചെയ്യില്ലെന്ന് പറഞ്ഞു. ഈശോ എന്ന ചിത്രത്തിലും കേശു ഈ വീടിന്റെ നാഥന് എന്ന ചിത്രത്തിലും മുഴുനീള വേഷമായിരുന്നു. പക്ഷെ തനിക്ക് നന്നായി വിശ്രമിക്കണം എന്നും, ഒന്ന് ആസ്വദിക്കണം എന്നും പറഞ്ഞ് ഒഴിവാക്കി.
അവനത് മനസ്സിലാക്കാന് സാധിയ്ക്കും. കാരണം, അവന് തന്നെ അറിയാം. എന്നാലും തന്നെ പൂര്ണമായും ഒഴിവാക്കാന് നാദിര്ഷയ്ക്ക് കഴിയില്ല. അതുകൊണ്ട് രണ്ട് ചിത്രങ്ങളിലും തന്റെ ശബ്ദം ഉണ്ടാവും എന്നാണ് സലിം കുമാര് പറയുന്നത്. കരിയറിന്റെ തുടക്ക കാലത്ത് ചിരി കൊണ്ട് പല അവസരങ്ങളും നഷ്ടമായതിനെ കുറിച്ചും താരം പറയുന്നു.
തന്നോട് കഥ പറയുമ്പോള്, തമാശ രംഗങ്ങളുണ്ടെങ്കില് താന് ചിരിക്കും. അപ്പോള് കഥ പറയുന്നവര് കരുതും താന് കളിയാക്കി ചിരിക്കുന്നതാണ് എന്ന്. അത് കാരണം പല അവസരങ്ങളും നഷ്ടപ്പെട്ടു. പിന്നീട് തനിക്ക് സിനിമയില് ഭാഗ്യം കൊണ്ടു വന്നതും ഈ ചിരി തന്നെയാണ് എന്നും സലിം കുമാര് വ്യക്തമാക്കി.