ജിതു മാധവൻ- ഫഹദ് ഫാസിൽ കൂട്ടുകെട്ടിൽ പുറത്തിറങ്ങിയ ‘ആവേശം’ ഗംഭീര പ്രേക്ഷക പ്രതികരണങ്ങളുമായി മുന്നേറുകയാണ്. പതിമൂന്ന് ദിവസങ്ങൾ കൊണ്ട് ചിത്രം 100 കോടി ക്ലബ്ബിലും കയറിയിരുന്നു. ഫഹദിന്റെ കരിയറിലെ തന്നെ ഏറ്റവും മികച്ച കഥാപാത്രങ്ങളിലൊന്നാണ് ആവേശത്തിലെ രംഗ.
ബംഗളുരുവിലെ ഒരു കോളേജ് പശ്ചാത്തലത്തിലുള്ള 3 മലയാളി വിദ്യാർത്ഥികളുടെ കഥയും ശേഷം അവർ നേരിടുന്ന ചില പ്രശ്നങ്ങൾക്ക് രംഗ എന്ന ലോക്കൽ ഗുണ്ടാ നേതാവിന്റെ സഹായം തേടുന്നതും തുടർന്നുള്ള രസകരമായ സംഭവ വികാസങ്ങൾ ബ്ലാക്ക് ഹ്യൂമറിന്റെയും ഗ്യാങ്ങ്സ്റ്റർ സ്പൂഫിന്റെയും പശ്ചാത്തലത്തിൽ പറയുന്നതുമാണ് ആവേശത്തിന്റെ പ്രമേയം.
ഫഹദിന്റെ കൂടെ ഏറ്റവും കൂടുതൽ പ്രശംസകൾ നേടിയ കഥാപാത്രമായിരുന്നു സജിൻ ഗോപു അവതരിപ്പിച്ച അമ്പാൻ. എന്തിനും ഏതിനും രംഗണ്ണന്റെ കൂടെ കട്ടയ്ക്ക് നിൽക്കുന്ന അമ്പാൻ തിയേറ്ററുകളിൽ മികച്ച കയ്യടിയാണ് നേടിയത്. ചിത്രത്തിലെ ശ്രദ്ധേയമായ ഒരു രംഗമായിരുന്നു അമ്പാൻ കുട്ടികൾക്ക് തോക്ക് പരിചയപ്പെടുത്തികൊടുക്കുന്ന രംഗം. ഇപ്പോഴിതാ ആ രംഗം ജഗതി ശ്രീകുമാർ വെട്ടം എന്ന ചിത്രത്തിൽ തോക്കുപയോഗിക്കുന്ന രംഗത്തിൽ നിന്നും ഇൻസ്പയേഡ് ആയി ചെയ്തതാണെന്ന് വെളിപ്പെടുത്തിയിരിക്കുകയാണ് സജിൻ ഗോപു.
“ഗൺ പരിചയപ്പെടുത്തി കൊടുക്കുന്ന ഒരു സീനുണ്ട്. ആ സീൻ എടുക്കുന്നതിന് മുമ്പ് ജിത്തു എന്നോട് പറഞ്ഞു, അളിയാ ഇങ്ങനെയൊരു സീനാണ്. തോക്ക് പരിചയപ്പെടുത്തി കൊടുക്കുകയാണ് ആദ്യം പൊട്ടില്ല പിന്നെ മൊത്തം പൊട്ടും. ഇതാണ് അവസ്ഥ.
ഞാൻ അത് എങ്ങനെ ചെയ്യണം എന്നെല്ലാം ആലോചിച്ചു. എല്ലാരുമായിട്ട് ചർച്ചയൊക്കെ നടത്തി. വെട്ടം സിനിമയിൽ ജഗതി ചെയ്തിട്ടുണ്ട് അതുപോലൊരു സാധനം. എ. കെ 47 എടുത്തിട്ട് ഫ്ലൂട്ട് പോലെ വായിക്കുന്നത്. പിന്നെ അത് കയ്യിൽ നിന്ന് പൊട്ടുകയാണ്. ചെയ്യുന്ന സമയത്ത് അതൊക്കെ എന്റെ മനസിൽ ഉണ്ടായിരുന്നു. അങ്ങനെയാണ് അത് ചെയ്യുന്നത്. അത് ശരിക്കും വർക്കായി. പ്രേക്ഷകർക്ക് ഒരുപാട് ഇഷ്ടപ്പെടുന്ന സീനാണത്.” എന്നാണ് ക്ലബ്ബ് എഫ്എമ്മിന് നൽകിയ അഭിമുഖത്തിൽ സജിൻ ഗോപു പറഞ്ഞത്.
അതേസമയം റിലീസ് ചെയ്ത് പതിമൂന്ന് ദിവസങ്ങൾ കൊണ്ടാണ് ചിത്രം 100 കോടി ക്ലബ്ബിലെത്തിയത്. ഓപ്പണിംഗ് ദിനത്തില് ആഗോളതലത്തില് 10 കോടിക്ക് മുകളില് നേടിയ ചിത്രം കേരളത്തില് മാത്രം 4 കോടിക്ക് അടുത്ത് കളക്ഷന് നേടിയിരുന്നു.
തുടര്ന്നുള്ള ദിവസങ്ങളില് എല്ലാം 3 കോടിക്ക് മുകളില് കളക്ഷന് ചിത്രം കേരളത്തില് നിന്നും നേടിയിട്ടുണ്ട്. ‘മഞ്ഞുമ്മല് ബോയ്സ്’, ‘ആടുജീവിതം’, ‘പ്രേമലു’ എന്നീ ചിത്രങ്ങള്ക്ക് ശേഷം ഈ വര്ഷം 100 കോടി ക്ലബ്ബില് എത്തുന്ന നാലാമത്തെ ചിത്രമാണ് ആവേശം. ഫഹദിന്റെ ആദ്യ നൂറ് കോടി ചിത്രം കൂടിയാണിത്.
അൻവർ റഷീദ് എന്റർടൈൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സിന്റെ ബാനറിൽ അൻവർ റഷീദ്, നസ്രിയ നസിം എന്നിവർ ചേർന്നാണ് ചിത്രം നിർമിക്കുന്നത്. ജിതു മാധവൻ തന്നെയാണ് ചിത്രത്തിന് തിരക്കഥ രചിച്ചിരിക്കുന്നത്.
മൻസൂർ അലി ഖാൻ, ആശിഷ് വിദ്യാർഥി, സജിൻ ഗോപു, പ്രണവ് രാജ്, ഹിപ്സ്റ്റർ, മിഥുൻ ജെ.എസ്, റോഷൻ ഷാനവാസ്, ശ്രീജിത്ത് നായർ, പൂജ മോഹൻരാജ്, നീരജ രാജേന്ദ്രൻ, തങ്കം മോഹൻ എന്നിവരാണ് ചിത്രത്തിലെ അഭിനേതാക്കൾ.