സംവിധായകന് രഞ്ജിത്ത് നഗ്നചിത്രങ്ങള് നടി രേവതിക്ക് അയച്ചു കൊടുത്തുവെന്ന യുവാവിന്റെ ആരോപണത്തോട് പ്രതികരിച്ച് രേവതി. തനിക്ക് അത്തരം ചിത്രങ്ങള് ഒന്നും രഞ്ജിത്ത് അയച്ചിട്ടില്ല, അതുകൊണ്ട് പ്രതികരിക്കേണ്ട ആവശ്യമില്ല എന്നാണ് ടൈംസ് ഓഫ് ഇന്ത്യയ്ക്ക് നല്കിയ അഭിമുഖത്തില് രേവതി പ്രതികരിച്ചിരിക്കുന്നത്.
”രഞ്ജിത്തിനെയും എന്നെയും ഉള്പ്പെടുത്തി മാധ്യമങ്ങളില് പ്രചരിക്കുന്ന വാര്ത്തകള് എനിക്ക് അറിയാം. എന്നാല് ഇത്തരത്തില് ആരോപിക്കപ്പെടുന്ന ഒരു ഫോട്ടോയും എനിക്ക് ലഭിച്ചിട്ടില്ല. അതുകൊണ്ട് തന്നെ അതേ കുറിച്ച് കൂടുതല് പ്രതികരിക്കേണ്ട ആവശ്യവുമില്ല” എന്നാണ് രേവതി പറയുന്നത്.
ഹേമ കമ്മിറ്റി റിപ്പോര്ട്ട് പുറത്തുവന്നതിന് പിന്നാലെ സംവിധായകന് രഞ്ജിത്തിനെതിരെ ലൈംഗികാരോപണവുമായി ബംഗാളി നടിയും ഒരു യുവാവും രംഗത്തെത്തിയിരുന്നു. സിനിമയില് അവസരം വാഗ്ദാനം ചെയ്ത് ലൈംഗികാതിക്രമത്തിന് ഇരയാക്കിയെന്നായിരുന്നു യുവാവിന്റെ പരാതി. ഹോട്ടല് മുറിയില്വെച്ച് തന്നെ രഞ്ജിത്ത് പീഡിപ്പിച്ചെന്നും ചിത്രങ്ങള് നടി രേവതിക്ക് അയച്ചു എന്നുമായിരുന്നു യുവാവിന്റെ പരാതി.
2012ല് ബാവൂട്ടിയുടെ നാമത്തില് എന്ന ചിത്രത്തിന്റെ ലൊക്കേഷനില് നടന്മാരെ കാണാന് പോയപ്പോഴാണ് രഞ്ജിത്തിനെ പരിചയപ്പെട്ടത്. അന്ന് താന് പ്ലസ് ടു വിദ്യാര്ഥിയായിരുന്നു. പിന്നീട് ബെംഗളൂരുവിലെ പഞ്ചനക്ഷത്ര ഹോട്ടലില് വരാന് ആവശ്യപ്പെടുകയും അവിടെ വച്ച് സിനിമയില് അവസരം വാഗ്ദാനം ചെയ്ത്, മദ്യം നല്കി ക്രൂരമായി പീഡിപ്പിച്ചു എന്നുമാണ് യുവാവ് പറഞ്ഞത്.