വിരാട് – അനുഷ്‌ക വിവാഹത്തിനു ശേഷം അടുത്തതായി നടക്കുന്ന ബോളിവുഡ് താരവിവാഹം ദീപിക പദുകോണിന്റെയും കാമുകന്‍ രണ്‍വീര്‍ സിംഗിന്റെയും ആയിരിക്കുമെന്നാണ് റിപ്പോര്‍ട്ടുകള്‍ വന്നത്. എന്നാല്‍ ഇക്കാര്യത്തില്‍ സ്ഥിരീകരണവുമായി ഒരു ബോളിവുഡ് മാധ്യമം രംഗത്തുവന്നിരിക്കുന്നു. തന്റെ വിവാഹമോ വിവാഹനിശ്ചയമോ കഴിഞ്ഞിട്ടില്ലെന്നാണ് ദീപികയുടെ വെളിപ്പെടുത്തല്‍.
കുറച്ചു നാളുകള്‍ക്കു മുന്‍പ് നടി ഗര്‍ഭിണിയാണെന്നും അതിനാല്‍ വിവാഹം പെട്ടെന്നു തന്നെയുണ്ടാകുമെന്ന തരത്തില്‍ വാര്‍ത്തകളുണ്ടായിരുന്നു. എന്നാല്‍ ദീപിക തന്നെ മാധ്യമങ്ങളോട് ഇത്തരത്തിലുള്ള അടിസ്ഥാനരഹിതമായ പ്രചാരണങ്ങള്‍ ദുസ്സഹമാണെന്ന് പറഞ്ഞിരുന്നു. സഞ്ജയ് ലീല ബന്‍സാലിയുടെ സംവിധാനത്തില്‍ 2013ല്‍ തീയേറ്ററുകളിലെത്തിയ രാമലീലയില്‍ അഭിനയിച്ചതോടെയാണ് ദീപികയും രണ്‍വീറും പ്രണയത്തിലാണെന്ന വാര്‍ത്തകള്‍ പുറത്തു വന്നത്.
പിന്നീട് ഇരുവരും ഒന്നിച്ച് പൊതുചടങ്ങുകളിലും പാര്‍ട്ടികളിലും പങ്കെടുക്കുന്നതു പതിവായതോടെ താരങ്ങള്‍ ഗോസിപ്പുകോളങ്ങളില്‍ നിറഞ്ഞു. എന്നാല്‍ പ്രണയത്തെക്കുറിച്ച് ചോദിക്കുമ്‌പോഴെല്ലാം ഒഴിഞ്ഞുമാറുന്ന രണ്‍വീറും ദീപികയും തങ്ങള്‍ പ്രണയത്തില്‍ അല്ലെന്നു ഇതുവരെ വ്യക്തമായി പറഞ്ഞിട്ടില്ല. അതേസമയം അടുത്തിടെ പുറത്തു വന്ന ഒരു വീഡിയോയില്‍ രണ്‍വീര്‍ ദീപികയോട് തന്റെ പ്രണയം തുറന്നു പറഞ്ഞിരുന്നു.
