തെന്നിന്ത്യയുടെ പ്രിയതാരങ്ങളായ രശ്മിക മന്ദാനയുടെയും വിജയ് ദേവരകൊണ്ടയുടെയും വിവാഹചിത്രങ്ങൾ വൈറലാകുന്നു. ഹൃദ്യമായ ഒരു കുറിപ്പോടെ വിജയ് വിവാഹചിത്രങ്ങൾ പോസ്റ്റ് ചെയ്തതോടെ ആരാധകരും ഏറ്റെടുക്കുകയായിരുന്നു.
‘ഒരു ദിവസം, ഞാൻ അവളെ മിസ്സ് ചെയ്തു. അവളില്ലാത്ത ഒരു ദിവസം അപൂർണമാണെന്ന് എനിക്ക് തോന്നി… ഒരുപക്ഷേ അവൾ കൂടെയുണ്ടായിരുന്നെങ്കിൽ എന്റെ ആ ദിവസം ഇതിലും മനോഹരമായേനെ. ഞങ്ങൾ ഒന്നിച്ചിരുന്ന് ഭക്ഷണം കഴിച്ചിരുന്നെങ്കിൽ ആ ഭക്ഷണത്തിന് കൂടുതൽ രുചിയും ആത്മബന്ധവും ഉണ്ടായേനെ. ഞങ്ങൾ ഒരുമിച്ച് വ്യായാമം ചെയ്തിരുന്നെങ്കിൽ, അതൊരു ശിക്ഷയായി തോന്നാതെ എത്ര സന്തോഷമുള്ള ഒന്നായേനെ. എനിക്ക് അവളെ വേണമായിരുന്നു- എവിടെയാണെങ്കിലും, ഒരു ആശ്വാസത്തിനും സമാധാനത്തിനും… എന്റെ വീട് അവളാണെന്ന് എനിക്ക് തോന്നി. അതുകൊണ്ട്, എന്റെ ഉറ്റസുഹൃത്തിനെ ഞാൻ എന്റെ ഭാര്യയാക്കി’ എന്നാണ് വിജയ് ചിത്രങ്ങളോടൊപ്പം കുറിച്ചത്.
ഉദയ്പൂരിന് പുറത്ത് 50 കിലോമീറ്റർ അകലെയുള്ള ‘ഐടിസി മെമെന്റോസ്’ എന്ന ആഡംബര ഹോട്ടലിൽ കുടുംബാംഗങ്ങളുടെയുടെയും അടുത്ത സൃഹൃത്തുക്കളുടെയും സാന്നിധ്യത്തിലാണ് വിജയ് രശ്മികയുടെ കഴുത്തിൽ താലി കെട്ടിയത്. ഏറ്റവും അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ വളരെ സ്വകാര്യമായ ചടങ്ങുകളോടെയായിരുന്നു താരവിവാഹം.
വിവാഹവേദിയിൽ മൊബൈൽ ഫോണുകൾക്കും ക്യാമറകൾക്കും കർശനവിലക്ക് ഏർപ്പെടുത്തിയിരുന്നു. വിവാഹചിത്രങ്ങൾ ചോരാതിരിക്കാനായിരുന്നു വിലക്ക്. കഴിഞ്ഞ ദിവസങ്ങളിലായി നടന്ന പ്രി വെഡ്ഡിങ് ആഘോഷങ്ങളുടെയും മെഹന്ദി, ഹൽദി പോലുള്ള ചടങ്ങുകളുടെയും ചിത്രങ്ങളും, തീം ഫോട്ടോകളും വളരെ പെട്ടെന്നാണ് സോഷ്യൽ മീഡിയയിൽ വൈറലായത്.
ഏറെ നാളുകളായി താരങ്ങൾ പ്രണയത്തിലാണെന്ന് ഗോസിപ്പുകൾ പ്രചരിച്ചിരുന്നു. എന്നാൽ അടുത്തിടെയാണ് തങ്ങൾ വിവാഹിതരാകാൻ പോവുകയാണെന്ന് ഇരുവരും പരസ്യപ്പെടുത്തിയത്.