ജീവിതത്തില്‍ ഏറ്റവും കൂടുതല്‍ ടെന്‍ഷനടിച്ച സന്ദര്‍ഭത്തെ കുറിച്ച് നടന്‍ പൃഥ്വിരാജ്. മകള്‍ അലംകൃതയുടെ ജനനസമയത്താണ് താന്‍ ഏറ്റവും ടെന്‍ഷനടിച്ചതെന്ന് പൃഥ്വി പറയുന്നു. “കുറച്ച് കോംപ്ലിക്കേഷന്‍സുണ്ടായിരുന്നു. അന്നത്തെ 48 മണിക്കൂര്‍ എങ്ങനെയാണ് കടന്നുപോയതെന്നറിയില്ല. ഇത്തരം കാര്യങ്ങളൊന്നും എന്റെ കൈയില്‍ നില്‍ക്കുന്നതല്ലല്ലോയെന്ന ആ സമയത്ത് ഞാന്‍ ഓര്‍ത്തു.” റെഡ് എഫ്എമ്മുമായുള്ള അഭിമുഖത്തില്‍ പൃഥ്വി പറഞ്ഞു.
മകളുടെ ജനനത്തിന് ശേഷം താന്‍ കുറച്ച് സോഫ്റ്റായിട്ടുണ്ടാവാമെന്നും പൃഥ്വി പറയുന്നു. അത് ബോധ പൂര്‍വ്വമല്ലെന്നും പൃഥ്വി പറഞ്ഞു. പേടിയുള്ള കാര്യങ്ങളെ കുറിച്ച് ചോദിച്ചപ്പോള്‍ അങ്ങനെ അത്ര പെട്ടെന്നൊന്നും ഒരാള്‍ക്ക് തന്നെ ഭയപ്പെടുത്താനാവില്ലെന്നായിരുന്നു പൃഥ്വിയുടെ മറുപടി. എന്നാല്‍ മകളെ തനിക്ക് പേടിയുണ്ടെന്ന് പൃഥ്വി പറഞ്ഞു.
“പെട്ടെന്ന് സങ്കടം വരുന്ന ആളാണ് ഞാന്‍. സിനിമ കണ്ട് കരയാറുണ്ട്. അധികമാര്‍ക്ക് മുന്നിലും ഞാന്‍ യഥാര്‍ത്ഥത്തിലുള്ള എന്നെ പുറത്തെടുക്കാറില്ല. മോള് കരഞ്ഞാല്‍ ഞാനും കൂടെക്കരയും. ഇരുപത്തെട്ടിന് അവളുടെ കാത് കുത്താന്‍ വന്നയാളിനെ ഓടിച്ചാലോയെന്ന് ഞാന്‍ ആലോചിച്ചിട്ടുണ്ട്.” പൃഥ്വി പറഞ്ഞു.