വരുന്ന അസംബ്ലി തിരഞ്ഞെടുപ്പില്‍ ബിജെപി സ്ഥാനാര്‍ത്ഥിയായി മത്സരിക്കുമെന്ന റിപ്പോര്‍ട്ടുകളോട് പ്രതികരിച്ച് സിനിമാ-സീരിയല്‍ താരം പ്രവീണ. താരത്തെ സ്ഥാനാര്‍ത്ഥിയാക്കാനുള്ള ശ്രമത്തിലാണ് ബിജെപി സംസ്ഥാന നേതൃത്വം. തിരുവനന്തപുരം, കൊല്ലം ജില്ലകളിലെ ഏതെങ്കിലും സീറ്റില്‍ പ്രവീണയെ പരിഗണിക്കും എന്ന റിപ്പോര്‍ട്ടുകളാണ് പ്രചരിക്കുന്നത്.
“”ഇങ്ങനെയൊരു വാര്‍ത്ത വന്നത് പോലും താന്‍ അറിഞ്ഞിട്ടില്ല. ഇപ്പോള്‍ രാഷ്ട്രീയത്തിലേക്കില്ല. രാഷ്ട്രീയം എന്താണ് എന്ന് പോലും അറിയില്ല. എന്തായാലൂം ഇങ്ങനെയൊരു ചിന്ത കൊണ്ടു വന്നയാള്‍ക്ക് നന്ദി”” എന്നാണ് പ്രവീണ സമയം മലയാളത്തോട് പ്രതികരിച്ചത്.
സംവിധായകന്‍ രാജസേനനും ഇത്തവണ സീറ്റ് നല്‍കുമെന്നും റിപ്പോര്‍ട്ടുകളുണ്ട്. നെടുമങ്ങാട് മണ്ഡലത്തിലെ ബിജെപി സ്ഥാനാര്‍ത്ഥിയായിരുന്നു രാജസേനന്‍. പാര്‍ട്ടി പറഞ്ഞാല്‍ മത്സരിക്കും എന്ന് നടന്‍ കൃഷ്ണകുമാര്‍ തുറന്നു പറഞ്ഞിട്ടുണ്ട്.
അതേസമയം, വൈപ്പിന്‍ നിയമസഭാ മണ്ഡലത്തില്‍ നടന്‍ ധര്‍മജന്‍ ബോള്‍ഗാട്ടി യുഡിഎഫ് സ്ഥാനാര്‍ത്ഥിയായി മത്സരിക്കുമെന്നും അഭ്യൂഹങ്ങളും പ്രചരിച്ചിരുന്നു. എന്നാല്‍ ഇക്കാര്യം നിഷേധിച്ച് ധര്‍മജനും യുഡിഎഫ് ജില്ലാ നേതൃത്വവും രംഗത്തെത്തിയിരുന്നു.