ലോകേഷ് സിനിമാറ്റിക് യൂണിവേഴ്‌സില്‍ അടുത്തതായി എത്തുന്ന ചിത്രം ‘കൈതി 2′ തന്നെയാണെന്ന് ഉറപ്പിച്ച് നടന്‍ നരേന്‍. ക്വീന്‍ എലിസബത്ത്’ എന്ന സിനിമയുടെ പ്രൊമോഷനുമായി ബന്ധപ്പെട്ട പരിപാടിയില്‍ ആയിരുന്നു നരേന്‍ സംസാരിച്ചത്. എല്‍സിയുവിന്റെ തുടക്കം പറയുന്ന ഷോര്‍ട്ട് ഫിലിമും എത്തുന്നുണ്ട് എന്നും നരേന്‍ വ്യക്തമാക്കി.
”ഉറപ്പായിട്ടും കൈതിയുടെ രണ്ടാം ഭാഗം ഉണ്ടാകും. എല്‍സിയുവില്‍ അടുത്തതായി അതാണ് വരുന്നത്. അതിനിടയില്‍ ഒരു സംഭവം ഉണ്ട്, അത് പുറത്തു പറഞ്ഞിട്ടില്ല. ഞാന്‍ ഒരു ഷോര്‍ട്ട് ഫിലിം ചെയ്തു. ലോകേഷും ഞാനും കൂടി ചേര്‍ന്നാണ് ചെയ്തിരിക്കുന്നത്.”
”ഒരു 10 മിനിറ്റ് ഷോര്‍ട്ട് ഫിലിം ആണ്. അതിന് എല്‍സിയുവുമായി ബന്ധമുണ്ട്. അതാണ് എല്‍സിയുവിന്റെ തുടക്കം. അതിപ്പോള്‍ അധികം താമസിയാതെ വരും” എന്നാണ് നരേന്‍ പറയുന്നത്. അതേസമയം, കൈതി 2വിന്റെ ഇനിയുള്ള കഥ തനിക്ക് അറിയില്ലെന്ന് മുമ്പ് ഒരു അഭിമുഖത്തില്‍ നരേന്‍ വ്യക്തമാക്കിയിരുന്നു.
വിക്രം ഇറങ്ങിയ ശേഷം കഥ മുഴുവന്‍ മാറി അതായത് താന്‍ ചെയ്ത കഥാപാത്രമായ ബിജോയുടെ ലൈഫ് മാറി എന്നാണ് നരേന്‍ ഒരു മാധ്യമത്തിന് നല്‍കിയ അഭിമുഖത്തില്‍ പറയുന്നത്. 2019ല്‍ ആണ് കൈതി തിയേറ്ററുകളില്‍ എത്തിയത്. ഈ വര്‍ഷം ജൂണില്‍ ആയിരുന്നു വിക്രം റിലീസ് ചെയ്തത്.
കൈതിയിലെ നരേന്റെ കഥപാത്രം ബിജോയും കാര്‍ത്തിയുടെ കഥപാത്രം ഡില്ലിയും വിക്രം സിനിമയിലും എത്തുന്നുണ്ട്. കൈതിയുടെ രണ്ടാം ഭാഗം എത്തിയതിന് ശേഷമാകും വിക്രത്തിന്റെ രണ്ടാം ഭാഗം ലോകേഷ് ഒരുക്കുക എന്നാണ് റിപ്പോര്‍ട്ടുകള്‍.