മലയാള സിനിമയിലെ വമ്പന്‍ ഹിറ്റുകളുടെ അമരത്ത് എന്നും ഉണ്ടാകുന്ന പേരാണ് തിരക്കഥാകൃത്ത് ഡെന്നീസ് ജോസഫ്. തന്റെ വളര്‍ച്ചയിലും തളര്‍ച്ചയിലും തന്റെ ഒപ്പമുണ്ടായിരുന്ന സഹോദര തുല്യനായ സുഹൃത്ത് എന്നാണ് മമ്മൂട്ടി ഡെന്നീസ് ജോസഫിനെ വിശേഷിപ്പിക്കുന്നത്.
“”വളര്‍ച്ചയിലും തളര്‍ച്ചയിലും എന്റെ ഒപ്പം ഉണ്ടായിരുന്ന സഹോദര തുല്യനായ സുഹൃത്ത് ഇപ്പോഴില്ല, എഴുതിയതും സംവിധാനം ചെയ്തതുമായ എല്ലാ സിനിമകളിലൂടെയും അദ്ദേഹം ഓര്‍മിക്കപ്പെടും. നിത്യശാന്തി നേരുന്നു”” എന്നാണ് മമ്മൂട്ടി ഫെയ്‌സ്ബുക്കില്‍ കുറിച്ചിരിക്കുന്നത്.
മമ്മൂട്ടിയുടെ കരിയറിലെ തിരിച്ചുവരവ് അടയാളപ്പെടുത്തിയ ചിത്രമായ ന്യൂഡല്‍ഹിയുടെ തിരക്കഥ ഒരുക്കിയത് ഡെന്നിസ് ജോസഫ് ആയിരുന്നു. മമ്മൂട്ടിയുടെ ശ്രദ്ധേയ ചിത്രങ്ങളായ നിറക്കൂട്ട്, സംഘം, നായര്‍ സാബ്, കോട്ടയം കുഞ്ഞച്ചന്‍ എന്നിവയ്‌ക്കൊക്കെ തിരക്കഥയൊരുക്കിയത് അദ്ദേഹമായിരുന്നു.
1985ല്‍ ജേസി സംവിധാനം ചെയ്ത ഈറന്‍ സന്ധ്യയ്ക്ക് എന്ന ചിത്രത്തിന് തിരക്കഥ എഴുതിയാണ് ഡെന്നീസ് ജോസഫ് ചലച്ചിത്രരംഗത്ത് പ്രവേശിച്ചത്. മനു അങ്കിള്‍ എന്ന ചലച്ചിത്രത്തിലൂടെ ആദ്യമായി സംവിധായകനായി. അവസാനമായി ഒമര്‍ ലുലുവിന്റെ സംവിധാനത്തില്‍ ഒരുങ്ങുന്ന പവര്‍ സ്റ്റാറിന്റെ തിരക്കുകളിലായിരുന്നു അദ്ദേഹം.