വന്ദേഭാരത് ട്രെയിനിന് മുകളില് പാലക്കാട് എംപി വി.കെ ശ്രീകണ്ഠന്റെ പോസ്റ്ററുകള് ഒട്ടിച്ച സംഭവത്തില് പ്രതികരിച്ച് നടനും ബിജെപി അനുഭാവിയും ആയ കൃഷ്ണകുമാര്. ‘ഇത് ലോക ചെറ്റത്തരം’ എന്നായിരുന്നു സംഭവത്തിന്റെ ചിത്രങ്ങള് പങ്കുവെച്ച് കൃഷ്ണകുമാര് പ്രതികരിച്ചത്.
ഷൊര്ണൂര് റെയില്വേ സ്റ്റേഷനില് ട്രെയിന് എത്തിയപ്പോഴായിരുന്നു കോണ്ഗ്രസ് പ്രവര്ത്തകര് എംപി ശ്രീകണ്ഠന്റെ ചിത്രങ്ങള് വിന്ഡോയില് ഒട്ടിച്ചത്. റെയില്വേ പൊലീസ് സംഘമെത്തി പോസ്റ്ററുകള് ഉടന് നീക്കം ചെയ്തു.
നേരത്തെ വന്ദേഭാരതിന് ഷൊര്ണൂരില് സ്റ്റോപ്പ് അനുവദിക്കാതിരുന്ന വേളയില് എംപി ഇടപെടുകയും റെയില്വേ മന്ത്രിക്ക് കത്തയക്കുകയും ചെയ്തിരുന്നു. കോണ്ഗ്രസ് പ്രവര്ത്തകരുടെ പ്രവൃത്തിക്കെതിരെ വലിയ വിമര്ശമാണ് സോഷ്യല് മീഡിയയില് ഉയരുന്നത്.
അതേസമയം, സംഭവത്തില് റെയില്വേ സുരക്ഷാസേന കേസെടുത്തു. ആര്പിഎഫ് ആക്ടിലെ 145സി (യാത്രക്കാരെ ശല്യപ്പെടുത്തുക), 147 (റെയില് പരിസരത്ത് അതിക്രമിച്ചു കയറുക), 166 (ട്രെയിനില് പോസ്റ്റര് ഒട്ടിക്കുക) തുടങ്ങിയ, ജാമ്യം കിട്ടുന്ന വകുപ്പുകളിലാണു കേസ്.