മമ്മൂട്ടിയുടെ ‘ടര്ബോ’ സിനിമ കണ്ടാല് തനിക്ക് കരച്ചില് വരുമെന്ന് നടനും താരത്തിന്റെ സഹോദരനുമായ ഇബ്രാഹിംകുട്ടി. അതൊരു കോമഡി സിനിമ ആണെങ്കിലും സങ്കടം വരും എന്നാണ് നടന് പറയുന്നത്. ദുല്ഖര് സല്മാന്റെ ‘ലക്കി ഭാസ്കര്’ സിനിമയെ കുറിച്ചും മകന് മക്ബൂല് സല്മാന്റെ സിനിമാ പ്രതീക്ഷകളെ കുറിച്ചും ഇബ്രാഹിംകുട്ടി പറയുന്നുണ്ട്. ഒരു യൂട്യൂബ് ചാനലിന് നല്കിയ അഭിമുഖത്തിലാണ് ഇബ്രാഹിംകുട്ടി സംസാരിച്ചത്.
ദുല്ഖറിന്റെ ലക്കി ഭാസ്കര് കണ്ടപ്പോള്, ഭാസ്കറിനെ പിടിക്കപ്പെടും എന്നായപ്പോള് ഞാന് സിനിമ ഓഫ് ചെയ്തു. എനിക്ക് ടെന്ഷനായി. രാത്രി കണ്ടാല് ശരിയാവില്ല നാളെ ബാക്കി കാണാം എന്ന് വിചാരിച്ചു. ആളുകളുടെ കൂടെ ഇരുന്ന് കാണുമ്പോള് അത്രയും ടെന്ഷന് ഉണ്ടാകില്ല. ഇച്ചാക്കയുടെയോ ദുല്ഖറിന്റെയോ മക്ബൂലിന്റെയോ സിനിമ കാണുമ്പോഴും ഇങ്ങനെയാണ്.
ഇച്ചാക്കയുടെ ടര്ബോ സിനിമ കണ്ടാല് ഞങ്ങള്ക്ക് കരച്ചില് വരും. കോമഡി സിനിമയാണെങ്കിലും സങ്കടം വരും. അതിന് കാരണം ഞങ്ങള് ഇച്ചാക്കയെ കാണുമ്പോള് കിട്ടുന്ന ഒരു കണക്ഷനാണ്. കഥാപാത്രത്തിനും മുകളില് ആ വ്യക്തിയെ ഇങ്ങനെ കാണുമ്പോള് കിട്ടുന്ന ഫീല് ആണത്. അതുപോലെ ഇച്ചാക്കയുടെ തനിയാവര്ത്തനത്തിന്റെ ക്ലൈമാക്സ് ഞാന് ഇതുവരെ കണ്ടിട്ടില്ല.
ഇനി കാണുകയും ഇല്ല. വടക്കന് വീരഗാഥയിലെ എല്ലാ ഡയലോഗും കാണാതെ അറിയാം. സിനിമയില് അഭിനയിക്കാന് വീട്ടില് പറയാതെയാണ് മമ്മുട്ടി പോയിരുന്നത്. പീന്നിട് അഭിനയം നിര്ത്തിയെങ്കിലും കുറച്ച് കാലങ്ങള്ക്ക് ശേഷം സിനിമയിലേക്ക് എത്തിപ്പെടുകയായിരുന്നു. മോഹന്ലാല് ചമ്മല് ഉള്ള ആണ്. എന്നാല് മമ്മൂട്ടിയോട് സിനിമക്ക് അപ്പുറം വലിയ സൗഹൃദം കാത്തുസൂക്ഷിക്കുന്ന ആളാണ്.
മക്ബൂലിനെ കുറിച്ച് മമ്മൂട്ടിക്ക് വലിയ പ്രതീക്ഷയാണ്. നല്ല സ്പാര്ക്കുള്ള ആളാണെന്ന് പറയാറുണ്ട്. ഒരുപാട് നല്ല ജോലികള് കിട്ടിയിട്ടും ഓഡിഷന് എന്ന് പറഞ്ഞ് ഒരു മാസം തികയുന്നതിന് മുമ്പ് അവിടെ നിന്ന് പോരും. ഓഡിഷനില് റിജക്റ്റായിട്ടുമുണ്ട്. അസുരവിത്ത് അഭിനയിക്കാന് പോയപ്പോള് ആരോടും എന്റെ മകനാണെന്ന് വെളിപ്പെടുത്തിയിരുന്നില്ല എന്നാണ് ഇബ്രാഹിംകുട്ടി പറയുന്നത്.