ഹാസ്യ രംഗങ്ങളിലൂടെ മലയാളി പ്രേക്ഷകരെ പൊട്ടിച്ചിരിപ്പിച്ചിട്ടുള്ള താരമാണ് ഹരിശ്രീ അശോകന്. കേരളത്തിനകത്തും വിദേശത്തുമായി ഒരുപാട് പ്രോഗ്രാമുകള് ചെയ്തിട്ടുണ്ടെങ്കിലും പലരും വിഷുവിന് എത്താന് പറഞ്ഞ് തന്നെ വിളിച്ചിട്ടുണ്ട് എന്നാണ് ഹരിശ്രീ അശോകന് ഇപ്പോള് പറയുന്നത്.
ലാല് ജോസ് ചിത്രം ‘മീശമാധവനി’ല് വേഷമിട്ടതിന് ശേഷം കേരളത്തിനകത്തും പുറത്തും മറ്റു രാജ്യങ്ങളില് നിന്നും വിഷുവിന് ചെല്ലാന് പറഞ്ഞ് വിളിച്ചിട്ടുണ്ട് എന്നാണ് താരം ഇപ്പോള് തുറന്നു പറഞ്ഞിരിക്കുന്നത്. ആ ഒറ്റ വേഷം കൊണ്ട് പല രാജ്യങ്ങള് കാണാന് പറ്റി.
വിഷുവിന് പല പ്രോഗ്രാമുകള്ക്ക് പല രാജ്യങ്ങളില് പോകാന് പറ്റിയിട്ടുണ്ട്. ഇന്ത്യയില് തന്നെ പലയിടങ്ങളിലും പോയി. ഇപ്പോഴും പല സ്ഥലങ്ങളിലും ചെല്ലുമ്പോള് ആ രംഗം കട്ട് ചെയ്ത് വലിയ സ്ക്രീനില് കാണിക്കാറുണ്ട്. ഒരു മേക്ക് ഓവര് എന്നത് കലാകാരനെ സംബന്ധിച്ചിടത്തോളം വളരെ പ്രധാനമാണ്.
ഈ താടിയും മീശയും വെച്ചിട്ട് തന്നെയാണ് ഭിക്ഷക്കാരന് മുതല് കോളേജ് കുമാരന് വരെ ആയത്. വേറെ പടങ്ങളില് അഭിനയിച്ചു കൊണ്ടിരിക്കുമ്പോഴാണ് കൂടുതല് പടങ്ങളില് നിന്ന് അവസരം വന്നത്. അങ്ങനെ താടി വടിക്കാന് പറ്റാത്ത അവസ്ഥ വരികയായിരുന്നു.
പെണ്വേഷം കെട്ടിയപ്പോള് വരെ താടിയുണ്ടായിരുന്നു. താടിവെച്ച് ഇത്രയും വേഷങ്ങള് ചെയ്തിട്ട് ആളുകള് ഇഷ്ടപ്പെടുന്നു എന്നു പറഞ്ഞാല് അത് തന്റെ ഭാഗ്യം തന്നെയാണ് എന്നാണ് ഹരിശ്രീ അശോകന് ഒരു അഭിമുഖത്തില് പറയുന്നത്. 2002ല് ആണ് മീശമാധവന് പുറത്തിറങ്ങുന്നത്.