ഗായിക അമൃത സുരേഷുമായി വേര്പിരിഞ്ഞ് ഗോപി സുന്ദര് പുതിയ പ്രണയിനിക്കൊപ്പം എന്ന പ്രചാരണങ്ങള് ആയിരുന്നു കഴിഞ്ഞ ദിവസങ്ങളില് സോഷ്യല് മീഡിയയില് എത്തിയത്. ഒരു പെണ് സുഹൃത്തിനൊപ്പമുള്ള ചിത്രം പങ്കുവച്ചതോടെയാണ് പ്രചാരണങ്ങള് ആരംഭിച്ചത്. സ്വിറ്റ്സര്ലാന്ഡില് നിന്നുള്ള ചിത്രങ്ങള് ആയിരുന്നു ഗോപി സുന്ദര് പങ്കുവച്ചത്.
ഇത് സോഷ്യല് മീഡിയയില് ചര്ച്ചയായതോടെ പ്രതികരണവുമായി രംഗത്ത് വന്നിരിക്കുകയാണ് ഗോപി സുന്ദര്. ഇവിടെ ആരും ആരെയും ചതിച്ചിട്ടില്ല എന്നും എല്ലാവരും സന്തോഷമായി പോകുന്നുവെന്നും ഗോപി സുന്ദര് ഇന്സ്റ്റാഗ്രാമില് കുറിച്ചു.
”ഇവിടെ ആര്ക്കും ഒരു പ്രശ്നവുമില്ല. ഒരു കംപ്ലെയ്ന്റും ഇല്ല. ആരും ആരെയും ചതിച്ചിട്ടില്ല. എല്ലാവരും ഹാപ്പിയായി പോകുന്നു. നിങ്ങള്ക്ക് വേറെ ഒരു പണിയും ഇല്ലേ. ഈ ലോകത്ത് ഒരാളുമായി ഒരു ഫോട്ടോ പോസ്റ്റ് ചെയ്താല് അതിനെ പെണ്ണുപിടി എന്ന കാര്യമായി കാണാന് നിങ്ങള്ക്ക് എങ്ങനെ കഴിയുന്നു.”
”നമിച്ചു. അരി തീര്ന്നെങ്കില് അണ്ണന്മാര്ക്ക് മാസം അരി ഞാന് വാങ്ങിതരാം” എന്നാണ് ഗോപി സുന്ദര് കുറിച്ചിരിക്കുന്നത്. അതേസമയം, പെണ്കുട്ടിയുടെ മുഖം വ്യക്തമല്ലാത്ത ഒരു ചിത്രമായിരുന്നു ഗോപി സുന്ദര് സോഷ്യല് മീഡിയയില് പങ്കുവച്ചത്. എന്നാല് മയോനി എന്ന പ്രിയ നായര് അവരുടെ ഇന്സ്റ്റഗ്രാം സ്റ്റോറിയില് ഗോപിക്കൊപ്പമുള്ള ചിത്രം പങ്കുവച്ചിരുന്നു.
ഒരു മ്യൂസിക് ഷോയുടെ ഭാഗമായാണ് ഗോപി സുന്ദര് സ്വിറ്റ്സര്ലാന്ഡില് എത്തിയത്. എന്നാല് തീര്ത്ഥാടന യാത്രയിലാണ് അമൃത സുരേഷ്. ഇതോടെയാണ് ഒന്നിച്ച് മ്യൂസിക് ഷോകള് നടത്താറുള്ള ഇരുവരും വേര്പിരിഞ്ഞുവെന്ന വാര്ത്ത ശക്തമായത്. നേരത്തെയും ഇരുവരും വേര്പിരിഞ്ഞുവെന്ന പ്രചാരണങ്ങള് നടന്നിരുന്നു.