ഗര്ഭിണിയാണെന്ന് അറിയാതെ താന് ആക്ഷന് സീനുകള് ചെയ്തിട്ടുണ്ടെന്ന് നടി അഞ്ജലി നായര്. തമിഴില് ‘നമന്’ എന്ന സിനിമയുടെ ഷൂട്ടിംഗിനിടെ ക്ഷീണം വരാന് തുടങ്ങി. നാട്ടില് വന്ന് ഡോക്ടറെ കണ്ടപ്പോഴാണ് ഗര്ഭിണിയാണെന്ന് അറിഞ്ഞത്. എന്നാല് താന് സംഘട്ടന രംഗങ്ങളില് അടക്കം അഭിനയിച്ചതു കൊണ്ട് പേടിയായിരുന്നു എന്നാണ് അഞ്ജലി പറയുന്നത്.
നമന് എന്ന തമിഴ് സിനിമയില് അഭിനയിച്ച് കൊണ്ടിരിക്കുമ്പോള് ക്ഷീണം വരാന് തുടങ്ങി. കലാവസ്ഥ മാറിയതിന്റെയും യാത്ര ചെയ്തതിന്റെയുമൊക്കെ ബുദ്ധിമുട്ടായിരിക്കുമെന്ന് ഡോക്ടര് പറഞ്ഞപ്പോള് അത് നിസാരമായി വിട്ടു. ആ സിനിമയില് മുന്നിലേക്ക് മലര്ന്നടിച്ച് വീഴുന്നതും വൈബറേറ്റര് ഉപയോഗിച്ച് ചിത്രീകരിക്കുന്ന സീനുകളും ഉണ്ടായിരുന്നു.
വളരെ സ്പീഡില് ബൈക്കില് ഓടിച്ച് പോകുന്ന സീന് ഒക്കെ ഉണ്ടായിരുന്നു. ക്ഷീണം കൊണ്ട് നാട്ടില് വന്നിട്ട് ഡോക്ടറെ കണ്ടു. അപ്പോഴാണ് രണ്ട് മാസമായി താന് ഗര്ഭിണിയാണെന്ന് അറിഞ്ഞത്. വീണ്ടും ഗര്ഭിണിയാണെന്ന് അറിഞ്ഞതോടെ വലിയ ടെന്ഷനായി. ഏറ്റവും സുരക്ഷിതമായിട്ടിരിക്കേണ്ട മാസങ്ങളില് വാവയെ വയറ്റിലിട്ട് തകിടം മറിഞ്ഞ് കളിക്കുകയായിരുന്നു.
സ്കാന് ചെയ്തപ്പോള് കുഞ്ഞിന് ഒരു കുഴപ്പവുമില്ല. ഇതോടെ എല്ലാവരെയും വിളിച്ച് സന്തോഷ വാര്ത്ത അറിയിക്കാമെന്നും തീരുമാനിച്ചു. എന്നാല് അതിന് മുമ്പ് ‘മോണ്സ്റ്റര്’ ലൊക്കേഷനില് നിന്നും സംവിധായകന് വൈശാഖ് ഫോണ് ചെയ്തു. അഞ്ജലി എവിടെയാണെങ്കിലും ആലുവയിലുള്ള ഒരു കാര് ഷോറൂമിലേക്ക് വരാന് പറഞ്ഞു.
എന്താ കാര്യമെന്ന് ചോദിച്ചപ്പോള് ‘എന്റെ സിനിമയില് ചെറിയൊരു റോളുണ്ട്, ചെയ്യാനാണ്’ എന്ന് പറഞ്ഞു. വാവ ഉണ്ടെന്ന് അറിഞ്ഞ ഉടനെ വന്നൊരു വേഷമല്ലേ, അത് ചെയ്യാമെന്ന് തന്നെ കരുതി. ചെന്നപ്പോള് പൊലീസ് റോളാണ്. ഇതോടെ ഓട്ടവും ചാട്ടവുമൊക്കെ ഉണ്ടോ എന്നോര്ത്ത് പേടിയായി. സ്റ്റണ്ട് മാസ്റ്റര് വന്നിട്ട് ഒരു തോക്ക് ഒക്കെ തന്നു.
സീനൊക്കെ പറഞ്ഞ് തന്നിട്ട് അങ്ങോട്ടും ഇങ്ങോട്ടുമൊക്കെ ഓടാന് തുടങ്ങി. ഇതോടെ വൈശാഖേട്ടന്റെ അടുത്ത് പോയിട്ട് താന് ഗര്ഭിണിയാണെന്ന് പറഞ്ഞു. അദ്ദേഹത്തിനും സന്തോഷമായി. എങ്കില് പിന്നെ അഞ്ജലിയുടെ ഭാഗം ശരീരം അധികം അനക്കാത്ത രീതിയില് എടുക്കാമെന്ന് സംവിധായകന് ഉറപ്പ് നല്കുകയായിരുന്നു എന്നാണ് ഒരു ഷോയില് പങ്കെടുത്ത് അഞ്ജലി പറയുന്നത്.