മണിരത്‌നത്തിന്റെ സ്വപ്‌നച്ചിത്രമായ ‘പൊന്നിയിന്‍ സെല്‍വന്‍’ റിലീസിന് ഒരുങ്ങുകയാണ്. ചിത്രത്തില്‍ ചോള സാമ്രാജ്യത്തിലെ പഴുവൂര്‍ റാണിയായ നന്ദിനിയുടെ കഥാപാത്രത്തെയാണ് ഐശ്വര്യ റായ് അവതരിപ്പിക്കുന്നത്. നന്ദിനിയായി ഐശ്വര്യ റായ് ആയിരുന്നില്ല തന്റെ ആദ്യ ചോയിസ് എന്ന് വെളിപ്പെടുത്തിയിരിക്കുകയാണ് മണിരത്നം.
നന്ദിനിയായി ആദ്യം തന്റെ മനസിലുണ്ടായിരുന്ന നടി രേഖ ആയിരുന്നു എന്നാണ് മണിരത്നം പറയുന്നത്. 1994ല്‍ ആണ് പൊന്നിയിന്‍ സെല്‍വന്‍ ആദ്യമായി ചെയ്യാനൊരുങ്ങിയത്. പഴുവൂര്‍ റാണിയായി തന്റെ മനസ്സിലുണ്ടായിരുന്നത് രേഖ ആയിരുന്നു. എന്നാല്‍ അന്ന് അത് നടക്കാതെ പോയി.
പതിനാറ് വര്‍ഷങ്ങള്‍ക്കിപ്പുറമാണ് സിനിമ സാധ്യമായത്. ഒടുവില്‍ ഐശ്വര്യയിലേക്ക് എത്തുകയായിരുന്നു. ഇന്നത്തെ സാഹചര്യത്തില്‍ ഐശ്വര്യ അല്ലാതെ മറ്റൊരു നായിക മനസിലേക്ക് വന്നില്ല എന്നാണ് മണിരത്നം പറയുന്നത്. കല്‍ക്കി കൃഷ്ണമൂര്‍ത്തിയുടെ പൊന്നിയിന്‍ സെല്‍വന്‍ നോവലിനെ അടിസ്ഥാനമാക്കിയാണ് മണിരത്നം സിനിമ ഒരുക്കുന്നത്.
സെപ്റ്റംബര്‍ 30ന് ആണ് ചിത്രം ആഗോളതലത്തില്‍ റിലീസ് ചെയ്യുന്നത്. 500 കോടി മുതല്‍മുടക്കില്‍ ഒരുങ്ങുന്ന ചിത്രം മണിരത്‌നത്തിന്റെ ഉടമസ്ഥതയിലുള്ള മദ്രാസ് ടാക്കീസും ലൈക പ്രൊഡക്ഷനും ചേര്‍ന്നാണ് നിര്‍മിച്ചിരിക്കുന്നത്.
വിക്രം, കാര്‍ത്തി, തൃഷ, ഐശ്വര്യ ലക്ഷ്മി, ജയറാം, ജയംരവി, പ്രകാശ് രാജ്, പാര്‍ഥിപന്‍, ശരത്കുമാര്‍, ബാബു ആന്റണി, അശ്വിന്‍ കാകുമാനു, റിയാസ് ഖാന്‍, ലാല്‍, വിക്രം പ്രഭു, കിഷോര്‍, ശോഭിതാ ദൂലിപാല, ജയചിത്ര, റഹ്‌മാന്‍, ജയറാം തുടങ്ങി ഒരു വലിയ താരനിരയാണ് ചിത്രത്തില്‍ അണിനിരക്കുന്നത്.