നടിയെ ആക്രമിച്ച കേസുമായി ബന്ധപ്പെട്ട് താന്‍ അഭിപ്രായം പറഞ്ഞത് ദിലീപിനെ സന്തോഷിപ്പിക്കാന്‍ വേണ്ടിയല്ലെന്ന് നടന്‍ മധു. ആ രാത്രി നടിയെ ഒറ്റയ്ക്ക് പറഞ്ഞ് അയച്ചില്ലായിരുന്നുവെങ്കില്‍ ഈ വാര്‍ത്ത കാണേണ്ടി വരുമായിരുന്നില്ല. ദിലീപ് അങ്ങനെ ചെയ്യുമെന്ന് ഞാന്‍ വിശ്വസിക്കുന്നില്ല. അങ്ങനെ ആവരുതേ എന്നാണ് ആഗ്രഹിക്കുന്നത് എന്നാണ് മധു ഒരു അഭിമുഖത്തില്‍ പറഞ്ഞത്.
എന്നാല്‍ താന്‍ ദിലീപിനെ സന്തോഷിപ്പിക്കാന്‍ വേണ്ടി പറഞ്ഞതല്ലെന്നും അത് ദിലീപിനോട് തന്നെ പറഞ്ഞിട്ടുണ്ട് എന്നാണ് മധു സമകാലിക മലയാളത്തിന് നല്‍കിയ അഭിമുഖത്തില്‍ പറയുന്നത്. ഇടയ്ക്ക് ഒരു പെണ്‍കുട്ടി ഇതുപോലെ ഇന്റര്‍വ്യൂവിനു വന്നു. താന്‍ പറഞ്ഞു, ദിലീപ് അങ്ങനെ ചെയ്യുമെന്നോ ചെയ്യിപ്പിക്കുമെന്നോ വിശ്വസിക്കുന്നില്ല, അഥവാ അങ്ങനെ ചെയ്താലും അയാളല്ലാതിരിക്കട്ടെ എന്ന് ആഗ്രഹിക്കുന്നുവെന്ന്.
പിന്നെ, ടിവി തുറന്നാല്‍ കാണുന്നതു മുഴുവന്‍ ദിലീപിന്റെ കേസാണ്. അന്ന് പോകാന്‍ നേരത്ത് ആരെങ്കിലുമൊരാളെ ആ കുട്ടി (നടി) കൂടെ കൂട്ടിയിരുന്നെങ്കില്‍ ഇത് ഉണ്ടാകില്ലായിരുന്നു. ഇന്ന് തനിക്ക് ഇത് ടിവിയില്‍ കാണേണ്ടി വരില്ലായിരുന്നു. കുറച്ചു ദിവസം കഴിഞ്ഞ് ദിലീപ് തന്നെ വിളിച്ചു. ”സര്‍, വളരെ സന്തോഷം” എന്ന് പറഞ്ഞു.
”ദിലീപേ, ഞാന്‍ ദിലീപിനെ സന്തോഷിപ്പിക്കാന്‍ പറഞ്ഞതല്ല” എന്നു താനും പറഞ്ഞു. ആരെയും താന്‍ കുറ്റപ്പെടുത്തുന്നില്ല, ആരെങ്കിലും കൂടെയുണ്ടായിരുന്നെങ്കില്‍ എന്നേ പറഞ്ഞുള്ളു. അതു സത്യമാണ്. അവന് ഈ സിനിമാ ഇന്‍ഡസ്ട്രിക്ക് അകത്തു തന്നെ ഉള്ള ആളാണ്. മറ്റൊരാള്‍ കാണ്‍കെ അങ്ങനെ ചെയ്യില്ല, ചെയ്യാന്‍ സാധിക്കില്ല. ആ കുട്ടി ആരെയെങ്കിലുമൊന്ന് കൂടെ കൂട്ടിയാല്‍ മതിയായിരുന്നു എന്നാണ് മധു പറയുന്നത്.