പേരിന് പിന്നിലെ കഥ പറഞ്ഞ് നടൻ ചെമ്പൻ വിനോദ്. അമ്മ തനിക്ക് മറ്റൊരു പേരാണ് കരുതിയിരുന്നതെന്നും അതെങ്ങാനും ഇട്ടിരുന്നെങ്കിൽ പണി പാളിയേനെ എന്നും താരം പറയുന്നു. ക്ലബ് എഫ് എമ്മിന് നൽകിയ അഭിമുഖത്തിൽ സംസാരിക്കുകയായിരുന്നു ചെമ്പൻ വിനോദ്.
ടിൻ ടിൻ എന്ന കോമിക് കഥാപാത്രത്തിന്റെ പേരായിരുന്നു അമ്മ ഇടാൻ വിചാരിച്ചിരുന്നത് എന്നാണ് ചെമ്പൻ വിനോദ് പറഞ്ഞത്. എന്നാൽ ചെമ്പൻ എന്ന പേര് ക്യാച്ചിയായിട്ടാണ് തനിക്ക് തോന്നിയതെന്നും താരം പറഞ്ഞു.
‘ഈ പേര് ഭയങ്കര ക്യാച്ചി ആണെന്ന് എനിക്ക് തോന്നിയിട്ടുണ്ട്. ചെമ്പൻ വീട്ടുപേരാണ്. അല്ലെങ്കിലും വിനോദ് ജോസ് എന്ന് പറയുമ്പോൾ ഒരു കനമില്ല. അമ്മയോട് ഞാൻ ചോദിച്ചിട്ടുണ്ട് ഇതെന്ത് പേരാണെന്ന്. അമ്മ പറഞ്ഞത് ഞാൻ നിനക്ക് ടിൻ ടിൻ എന്ന പേരിടാനാണ് കരുതിയതെന്നാണ്. അമ്മ ടിൻ ടിൻ ഫാൻ ഒന്നുമല്ല. അമ്മയ്ക്ക് എവിടെനിന്നോ കിട്ടിയതാണ് അത്. അതെങ്ങാനും ഇട്ടിരുന്നുവെങ്കിൽ പണി പാളിയേനെ’ ചെമ്പൻ പറയുന്നു.
വിനോദ് എന്ന പേര് ആരാ ഇട്ടതെന്ന ചോദ്യത്തിന് അപ്പന്റെ ചേട്ടനൊക്കെ കൂടി ഇട്ടതെന്നാണ് അമ്മ പറഞ്ഞതെന്ന് താരം പറഞ്ഞു. അമ്മയ്ക്ക വലിയ താത്പര്യം ഇല്ലായിരുന്നു. അമ്മയുടെ അപ്പൻ പറഞ്ഞത് ജെയിംസ് എന്ന പേരിടാൻ ആയിരുന്നു. ജെയിംസ് എനിക്കും ഇഷ്ടമുള്ള പേരായിരുന്നു എന്നും ചെമ്പൻ പറഞ്ഞു.