ഒരാള്‍ക്ക് വിഷമമുണ്ടായാല്‍ അതിന് പോംവഴി കണ്ടെത്തുന്ന ആളാണ് മമ്മൂട്ടിയെന്ന് നടന്‍ ബൈജു ഏഴുപുന്ന. മമ്മൂട്ടിയുമായുള്ള ബന്ധത്തെ കുറിച്ചാണ് ബൈജു ഏഴുപുന്ന പറയുന്നത്. മമ്മൂട്ടിക്കൊപ്പം നടക്കുന്ന കുറച്ചു പേരില്‍ ഒരാളാണ് താന്‍ എന്നാണ് ക്ലബ് എഫ്എമ്മിന് നല്‍കിയ അഭിമുഖത്തില്‍ ബൈജു പറയുന്നത്.
മമ്മൂക്കയുമായി ഒരുപാട് സിനിമകള്‍ ചെയ്തിട്ടുണ്ട്. എഴുപുന്നതരകന്‍ സിനിമയില്‍ തുടങ്ങിയ ബന്ധമാണ്, ആ സിനിമയില്‍ താന്‍ വില്ലനായിരുന്നു. മമ്മൂക്ക എന്ന് പറഞ്ഞാല്‍ അതൊരു അവതാരം തന്നെയാണ്. മമ്മൂക്കയുടെ കൂടെ കൊണ്ടു നടക്കുന്ന കുറച്ച് പേരുണ്ട്.
അതില്‍ പെട്ട ഒരാളാണ് താന്‍. മമ്മൂക്കയോടൊപ്പം ഒരുപാട് സ്ഥലങ്ങളില്‍ പോയിട്ടുണ്ട്. ദുബായിലും അബുദാബിയിലും ഒക്കെ തന്നെ കൊണ്ടു പോയിട്ടുണ്ട്. ഈ 70ാം പിറന്നാളിന് മമ്മൂട്ടി സ്റ്റേറ്റ്സിലായിരുന്നു. അന്ന് അവിടെ ആദ്യം പോയി കണ്ടത് താനാണ്.
എന്തിനാണ് ഇത്ര ദൂരം വന്നതെന്നൊക്കെ അന്ന് മമ്മൂക്ക ചോദിച്ചു. വീട്ടില്‍ നിന്നും ഭക്ഷണമൊക്കെ ഉണ്ടാക്കി മമ്മൂക്കയ്ക്ക് കൊടുക്കാറുണ്ട്. അങ്ങനെ നല്ല ഒരു ബന്ധമാണ് തങ്ങള്‍ തമ്മിലുണ്ട്. ഒരാള്‍ക്ക് ഒരു വിഷമം ഉണ്ടായാല്‍ അത് മനസിലാക്കി അതിനൊരു പോംവഴി കാണുന്ന ആളാണ് മമ്മൂട്ടി.
കാണുമ്പോള്‍ അങ്ങനെയാണ് ഇങ്ങനെയാണ് എന്നൊക്കെ തോന്നും. ഭയങ്കര ആത്മാര്‍ത്ഥതയാണ് മമ്മൂക്കയ്ക്ക് എന്നാണ് ബൈജു പറയുന്നത്. അതേസമയം, എഴുപുന്ന തരകന്‍, മാമാങ്കം, ഗാനഗന്ധര്‍വന്‍, പോക്കിരിരാജ തുടങ്ങി നിരവധി സിനിമകളില്‍ മമ്മൂട്ടിയോടൊപ്പം ബൈജു അഭിനയിച്ചിട്ടുണ്ട്.