കരിയറില് താന് ഒരുപാട് വെല്ലുവിളികള് നേരിട്ടുണ്ടെന്ന് നടന് അജിത്ത്. സിനിമയില് വന്ന ആദ്യ കാലത്ത് തനിക്ക് തമിഴ് സംസാരിക്കാന് പോലും ശരിക്ക് അറിയില്ലായിരുന്നു. തന്റെ പേര് മാറ്റാന് പോലും പലരും പറഞ്ഞിരുന്നു. ഒരു റേസര് ആകാനും താന് കഠിനാധ്വാനം ചെയ്തിട്ടുണ്ട് എന്നും അജിത്ത് ദി ഹോളിവുഡ് റിപ്പോര്ട്ടറിന് നല്കിയ അഭിമുഖത്തില് പറഞ്ഞു.
”എനിക്ക് തമിഴ് ശരിയായി സംസാരിക്കാന് അറിയില്ലായിരുന്നു. എന്റെ ഉച്ചാരണത്തില് പ്രശ്നമുണ്ടായിരുന്നു. പിന്നീട് ഞാന് ശരിയാക്കി എടുക്കുകയായിരുന്നു. സിനിമയില് വന്ന ആദ്യ കാലത്ത് ആളുകള് എന്നോട് പേര് മാറ്റാന് ആവശ്യപ്പെട്ടിരുന്നു. കുറച്ച് കൂടി പരിചിതമായ ഒരു പേരിലേക്ക് മാറാന് പലരും ആവശ്യപ്പെട്ടിരുന്നു. എന്നാല് മറ്റൊരു പേര് വേണ്ടെന്ന് ഞാന് തീരുമാനിക്കുകയായിരുന്നു.”
”കരിയറില് ഒരുപാട് വെല്ലുവിളികള് ഉണ്ടായിരുന്നു. എല്ലാം ഞാന് മറികടന്നു. ഒരു റേസര് ആകാനായി ഒരു 19കാരനെ പോലെ ഞാന് കഠിനാധ്വാനം ചെയ്തിട്ടുണ്ട്. അഭിനയമായാലും റേസിംഗ് ആയാലും നല്ലൊരു ടീം വേണം. എനിക്ക് നല്ല ഭാഗ്യമുണ്ട്. എനിക്ക് ലഭിച്ച സംവിധായകര്, നിര്മ്മാതാക്കള്, സാങ്കേതിക വിദഗ്ധര്, മോട്ടോര്സ്പോര്ട്ടുമായി ബന്ധപ്പെട്ടവരില് നിന്നെല്ലാം ധാരാളം കാര്യങ്ങള് ഞാന് പഠിക്കുകയും ചെയ്തിട്ടുണ്ട്” എന്നാണ് അജിത്ത് പറയുന്നത്.
ആരാധകര് കാരണം തനിക്ക് പുറത്തേക്ക് ഇറങ്ങാന് പറ്റുന്നില്ലെന്നും അജിത്ത് അഭിമുഖത്തില് പറയുന്നുണ്ട്. ‘ആരാധകരുടെ സ്നേഹത്തോട് ഞാന് എന്നും കടപ്പെട്ടിരിക്കും, പക്ഷെ എന്റെ കുടുംബത്തിനൊപ്പം സമാധാനത്തോടെയൊന്ന് പുറത്തിറങ്ങാന് സാധിക്കാത്തതും അവര് കാരണമാണെന്ന് പറയേണ്ടി വരും” എന്നാണ് അജിത്ത് പറഞ്ഞത്.