ബോളിവുഡില്‍ എത്തുന്നതിന് മുമ്പ് താന്‍ പല ജോലികളും ചെയ്തിട്ടുണ്ടെന്ന് തുറന്നു പറഞ്ഞിട്ടുള്ള താരമാണ് അക്ഷയ് കുമാര്‍. ആ നാളുകളില്‍ താന്‍ കൊള്ളസംഘത്തിന്റെ കവര്‍ച്ചയ്ക്ക് ഇരയായിട്ടുണ്ട് എന്ന് അനുപം ഖേര്‍ ഷോയില്‍ താരം വെളിപ്പെടുത്തിയിരുന്നു.
അന്ന് ഫ്രണ്ടിയര്‍ മെയില്‍ ട്രെയ്‌നില്‍ ആഭരണങ്ങളും മറ്റും വില്‍ക്കുന്ന ജോലിയുണ്ടായിരുന്നു അക്ഷയ് കുമാറിന്. ഒരിക്കല്‍ അയ്യായിരം രൂപയോളം വില വരുന്ന തുണിത്തരങ്ങളും അവശ്യവസ്തുക്കളുമായി ട്രെയ്‌നില്‍ ഡല്‍ഹിയിലേക്ക് വരികയായിരുന്നു. ഈ യാത്രയിലാണ് അക്ഷയ്‌യെ ചമ്പല്‍ സംഘം കൊള്ളയടിച്ചത്.
ട്രെയ്ന്‍ ചമ്പലില്‍ എത്തിയപ്പോള്‍ ഏതാനും കൊള്ളക്കാര്‍ കയറി. ഈ സമയം ഉറങ്ങി കൊണ്ടിരുന്ന തനിക്ക് പെട്ടന്ന് കൊള്ള സംഘത്തിന്റെ സാന്നിധ്യം അനുഭവപ്പെട്ടു. സാഹചര്യത്തിന്റെ ഗൗരവം മനസിലാക്കി സീറ്റില്‍ തന്നെ ഉറക്കം നടിച്ചുകിടന്നു. ചെരിപ്പ് ഉള്‍പ്പെടെ ഒന്നൊഴിയാതെ എല്ലാം കൊള്ളയടിക്കപ്പെട്ടു.
ഓള്‍ഡ് ഡല്‍ഹി റെയില്‍വേ സ്റ്റേഷനില് വെറും കയ്യോടെയാണ് ഇറങ്ങിയത് എന്നാണ് അക്ഷയ് കുമാര്‍ പറഞ്ഞത്. അക്ഷയ്‌യുടെ വാക്കുകള്‍ സോഷ്യല്‍ മീഡിയയില്‍ ശ്രദ്ധ നേടിയിരിക്കുകയാണ്. സിനിമയിലെത്തും മുമ്പുള്ള തന്റെ കഥകള്‍ നേരത്തെയും അക്ഷയ് കുമാര്‍ തുറന്നുപറഞ്ഞിരുന്നു.
ചാന്ദ്‌നി ചൗക്കില്‍ താനുള്‍പ്പെടെ 24 പേര്‍ ഒരേ വീട്ടില്‍ താമസിച്ച കഥ അക്ഷയ് വാര്‍ത്താ ഏജന്‍സിയായ എഎന്‍ഐയോട് പറഞ്ഞിരുന്നു. എല്ലാവരും ഒരേ മുറിയിലായിരുന്നു ഉറങ്ങിയിരുന്നത്. രാവിലെ എഴുന്നേറ്റ് വ്യായാമം ചെയ്യാന്‍ പോകണമെങ്കില്‍ ഒരാള്‍ക്ക് അടുത്തയാളുടെ മുകളിലൂടെ ചാടേണ്ടി വന്നിരുന്നു എന്നായിരുന്നു അക്ഷയ് കുമാര്‍ പറഞ്ഞത്.