വിവാദങ്ങള് നിറഞ്ഞു നില്ക്കുമ്പോഴും ബോക്സ് ഓഫീസില് കുതിപ്പ് തുടരുകയാണ് രണ്ബിര് കപൂര് ചിത്രം ‘അനിമല്’. ചിത്രത്തിലെ വളരെ ബോള്ഡ് ആയ കഥാപാത്രമായിരുന്നു സോയ. രശ്മിക അവതരിപ്പിച്ച ഗീതാഞ്ജലി എന്ന കഥാപാത്രത്തിനേക്കാളേറെ ശ്രദ്ധ തൃപതി ദിമ്രി അവതരിപ്പിച്ച സോയക്ക് ലഭിക്കുന്നുണ്ട്.
ചിത്രത്തിന്റെ സെറ്റില് രശ്മികയ്ക്കൊപ്പമുള്ള അനുഭവങ്ങള് പങ്കുവച്ചിരിക്കുകയാണ് തൃപ്തി ഇപ്പോള്. ”രശ്മികയാണ് സെറ്റിലെ ഏറ്റവും നല്ലയാള്. ഒരു അസ്വസ്ഥതയും കൂടാതെ അവള് എന്നെ സ്വാഗതം ചെയ്തിരുന്നു. സാധാരണ രണ്ട് നായികമാര് ആകുമ്പോള് കുഴപ്പങ്ങള് ഉണ്ടാകും.. എന്നാല് ഞങ്ങള് തമ്മില് അങ്ങനെ ഉണ്ടായില്ല.”
”അവള് അത്രയ്ക്ക് മിടുക്കിയായിരുന്നു. എന്നെ കണ്ടപ്പോള് തന്നെ അടുത്ത് വന്നു, കെട്ടിപ്പിടിച്ചു, വരൂ ഞങ്ങളുടെ കൂടെ ഇരിക്കാം എന്ന് പറഞ്ഞ് വിളിച്ചു കൊണ്ടുപോയി. ഞാന് കുറച്ച് അസ്വസ്ഥയാണെന്ന് അവള്ക്ക് മനസിലായെങ്കിലും അവള് എന്നെ സ്വാഗതം ചെയ്തു. അത് വളരെ നല്ലൊരു ഗുണമായി ഞാന് കാണുന്നു” എന്നാണ് തൃപ്തി പറയുന്നത്.
അതേസമയം, സന്ദീപ് റെഡ്ഡി വംഗ സംവിധാനം ചെയ്ത ചിത്രത്തില് രണ്ബിറിന്റെ ഭാര്യയായാണ് രശ്മിക വേഷമിട്ടിരിക്കുന്നത്. ഡിസംബര് ഒന്നിന് റിലീസ് ചെയ്ത ചിത്രം ആഗോളതലത്തില് 600 കോടി കളക്ഷന് പിന്നിട്ടു കഴിഞ്ഞു. ചിത്രത്തിലെ സ്ത്രീവിരുദ്ധതയെ കുറിച്ചുള്ള ചര്ച്ചകളാണ് സോഷ്യല് മീഡിയയില് ഇപ്പോഴം നടക്കുന്നത്.