കങ്കണ റണാവത്തും തപ്സി പന്നുവും തമ്മിലുള്ള വാക്പോര് ഒരിടയ്ക്ക് ബോളിവുഡില് ചൂടുപിടിച്ചിരുന്നു. കങ്കണയും തപ്സിയും തമ്മില് ട്വിറ്ററില് പോര് മുറുകുന്നതിനിടെ, കങ്കണയുടെ സഹോദരി രംഗോലി ചന്ദല് തപ്സിയെ ബിഗ്രേഡ് നടിയെന്നും കങ്കണയുടെ വിലകുറഞ്ഞ കോപ്പി (സസ്തി കോപ്പി) എന്നും വിളിച്ചിരുന്നു.
ഈ പ്രസ്താവനകളൊക്കെ മനസിലിരിക്കെ ഒരു ദിവസം കങ്കണയെ നേരില് കാണുമ്പോള് എന്തായിരിക്കും പ്രതികരണം എന്ന ചോദ്യത്തിന് മറുപടി നല്കിയിരിക്കുകയാണ് തപ്സി ഇപ്പോള്. ”ഞാന് എന്ത് പറയാനാണ്. എനിക്കിപ്പോള് ആ സംഭവങ്ങളില് വിഷമമില്ല. എനിക്കറിയില്ല എന്ത് പറയുമെന്ന്.”
”പിങ്ക് സിനിമയുടെ സ്ക്രീനിംഗിനിടെ ഞാന് അവരെ കണ്ടിരുന്നു. അന്ന് ഒരു ഗസ്റ്റിനോട് സംസാരിക്കുന്നത് പോലെ ഹലോ, നന്ദി എന്നൊക്കെ പറഞ്ഞിരുന്നു. അവര് എന്റെ മുന്നില് വരുന്ന ഒരു സാഹചര്യം ഉണ്ടായാല് ഞാന് ഹലോ പറയും. മുഖം തിരിച്ച് ഞാന് പോകില്ല. എനിക്ക് അവരുമായി പ്രശ്നമില്ല. അവര്ക്ക് പ്രശ്നമുണ്ട്.”
”അത് അവരുടെ തീരുമാനം. ആദ്യം ഞാന് ശരിക്കും ഞെട്ടിപ്പോയിരുന്നു. കാരണം അവര് നല്ലൊരു അഭിനേതാവാണ്. അവര്ക്ക് മനസില് ഒരു സ്ഥാനം നല്കിയിരുന്നു. എന്നെ സസ്തി കോപ്പി എന്ന് വിളിച്ചപ്പോള് അവര് നല്ല നടിയായതിനാല് ഒരു അഭിനന്ദനമായി ഞാന് അത് സ്വീകരിക്കുകയായിരുന്നു” എന്നാണ് തപ്സി ഒരു അഭിമുഖത്തില് പറയുന്നത്.