സെയ്ഫ് അലിഖാനെ ആക്രമിച്ച പ്രതിയെ പൊലീസ് പിടികൂടിയിരിക്കുകയാണ്. നിലവില് മുംബൈ ലീലാവതി ആശുപത്രിയില് ചികിത്സയില് കഴിയുന്ന സെയ്ഫ് സുഖം പ്രാപിച്ചു വരികയാണ്. ഇതിനിടെ സെയ്ഫ് അലിഖാന്റെ ഹെല്ത്ത് ഇന്ഷുറന്സ് വിവരങ്ങള് സംബന്ധിച്ച കണക്കുകള് പുറത്തു വന്നിരിക്കുകയാണ്.
നടന്റെ ചികിത്സാ ചിലവുകളും ഡിസ്ചാര്ജ് തീയതിയും അടക്കമുള്ള വിവരങ്ങളാണ് എക്സില് പ്രചരിക്കുന്നത്. 35.95 ലക്ഷം രൂപയാണ് ആരോഗ്യ ഇന്ഷുറന്സ് ക്ലെയിം ആയി നടന് ഫയല് ചെയ്ത്. നിലവില് 25 ലക്ഷം രൂപ അംഗീകരിച്ചിട്ടുണ്ട്. ഫൈനല് ബില് സമര്പ്പിക്കുന്നത് അനുസരിച്ച് ബാക്കിയുള്ള തുക അനുവദിക്കുമെന്ന് സംഭവം സ്ഥിരീകരിച്ച് നിവ ബുപ ഹെല്ത്ത് ഇന്ഷുറന്സ് പ്രസ്താവനയിലൂടെ അറിയിച്ചു.
എന്നാല് സെയ്ഫിന്റെ ഡിസ്ചാര്ജ് തീയതി ഉള്പ്പെടെയുള്ള സുപ്രധാന വിവരങ്ങള് ചോര്ന്നതില് വ്യാപക വിമര്ശനവും ഉയരുന്നുണ്ട്. അതേസമയം, നടനെ ആക്രമിച്ച് മൂന്ന് ദിവസത്തിന് ശേഷമാണ് പ്രതിയെ താനെയില് നിന്നും മുംബൈ പൊലീസ് അറസ്റ്റ് ചെയ്തത് എന്നാണ് എഎന്ഐ റിപ്പോര്ട്ട് ചെയ്യുന്നത്.
തന്റെ പേര് ബിജോയ് ദാസ് എന്നാണ് ഇയാള് ആദ്യം പറഞ്ഞതെന്നും എന്നാണ് പിന്നീട് മുഹമ്മദ് സജ്ജാദ് എന്നാണെന്ന് വെളിപ്പെടുത്തിയതായും പൊലീസ് പറയുന്നുണ്ട്. ഇയാളുടെ ഐഡന്റിറ്റി പൊലീസ് അന്വേഷിച്ച് വരികയാണ്. വ്യാജ തിരിച്ചറിയല് രേഖയുള്ളതിനാല് അക്രമി ഇന്ത്യക്കാരനാണോ ബംഗ്ലദേശ് പൗരനാണോ എന്നും അന്വേഷിക്കുന്നുണ്ട്.