ലഹരിമരുന്ന് ഇടപാട് കേസില് ജയില് മോചിതയായതിന് ശേഷം മുംബൈയില് പുതിയ വീട് അന്വേഷിച്ച് നടി റിയ ചക്രബര്ത്തി. സഹോദരന് ഷൗവിക്കിന് ഒപ്പമാണ് താരം മുംബൈയില് വീട് അന്വേഷിച്ച് പൊതുസ്ഥലത്ത് പ്രത്യക്ഷപ്പെട്ടത്. സുശാന്ത് സിംഗ് രാജ്പുത്തിന്റെ മരണവുമായി ബന്ധപ്പെട്ട മയക്കുമരുന്ന് കേസില് ഒക്ടോബറിലാണ് റിയക്ക് ജാമ്യം ലഭിച്ചത്.
ഡിസംബര് 2-ന് ആണ് റിയയുടെ സഹോദരന് ഷൗവിക്കിന് ജാമ്യം ലഭിച്ചത്. മാധ്യമ പ്രവര്ത്തകരുടെ ചോദ്യങ്ങള്ക്ക് മറുപടി നല്കാതെ നടന്നു നീങ്ങിയ താരത്തിന്റെ ടീ ഷര്ട്ടിലെ വാചങ്ങളും ശ്രദ്ധ നേടുകയാണ്. “സ്നേഹമാണ് ശക്തി” എന്നെഴുതിയ പിങ്ക് ടീ ഷര്ട്ടാണ് റിയ ധരിച്ചിരിക്കുന്നത്.
നേരത്തെ എന്.സി.ബി ഓഫീസില് ചോദ്യം ചെയ്യലിന് എത്തിയ റിയ ധരിച്ച ടീ ഷര്ട്ടിലെ വാചകങ്ങളും ശ്രദ്ധ നേടിയിരുന്നു. “റോസസ് ആര് റെഡ്, വയലറ്റ്സ് ആര് ബ്ലൂ, പുരുഷാധിപത്യത്തെ തകര്ക്കാം, ഞാനും നിങ്ങളും” എന്ന വാചകമുള്ള നടിയുടെ ടീഷര്ട്ടിന്റെ ചിത്രം റിമ കല്ലിങ്കല് അടക്കമുള്ള മോളിവുഡ് താരങ്ങളും ബോളിവുഡ് താരങ്ങളും സോഷ്യല് മീഡിയയില് പങ്കുവച്ചിരുന്നു.
കഴിഞ്ഞ വര്ഷം ജൂണ് 14-ന് ബോളിവുഡ് താരം സുശാന്ത് സിംഗ് രാജ്പുത് ആത്മഹത്യ ചെയ്തത് ഏറെ വിവാദങ്ങള് സൃഷ്ടിച്ചിരുന്നു. സുശാന്തിന്റെ കാമുകിയായ റിയക്കെതിരെ കൊലപാതക കുറ്റാരോപണങ്ങളും ഉയര്ന്നു. തുടര്ന്നുണ്ടായ അന്വേഷണത്തിലാണ് ബോളിവുഡിനെ പിടിച്ചുലച്ച ലഹരിമരുന്ന് വിവാദം ആളിക്കത്തിയത്.