സന്ദീപ് റെഡ്ഡി വംഗ ചിത്രത്തില് ദീപിക പദുക്കോണിനെ മാറ്റി തൃപ്തി ദിമ്രിയെ നായികയാക്കിയതിനെ അഭിന്ദിച്ച് സംവിധായകന് രാം ഗോപാല് വര്മ്മ. തൃപ്തിയുടെ പേര് 9 ഭാഷകളിലായി എഴുതിയ പോസ്റ്റര് പങ്കുവച്ചു കൊണ്ടാണ് സന്ദീപ് റെഡ്ഡി തന്റെ സിനിമയിലെ നായികയെ മാറ്റിയ വിവരം അറിയിച്ചത്. ഈ പോസ്റ്റര് പങ്കുവച്ചു കൊണ്ടാണ് ആര്ജിവി അഭിനന്ദനങ്ങള് അറിയിച്ചിരിക്കുന്നത്.
വലിയ താരങ്ങളെ തഴഞ്ഞ് അനിമല് സിനിമയില് അതിശയകരമായ പെര്ഫോമന്സ് കാഴ്ചവച്ച തൃപ്തിയും നിങ്ങളും വീണ്ടും ഒന്നിക്കുന്ന ഈ സിനിമ ബോളിവുഡില് വലിയ മാറ്റം കൊണ്ടുവരും. അഭിനന്ദനങ്ങള് തൃപ്തി, നിങ്ങളുടെ സ്പിരിറ്റ് പറന്നുയരാന് സമയമായി എന്നാണ് ആര്ജിവി ട്വീറ്റ് ചെയ്തിരിക്കുന്നത്.
അതേസമയം, ദീപിക മുന്നോട്ട് വച്ച ഡിമാന്ഡുകള് അംഗീകരിക്കാന് കഴിയില്ലെന്നും അതിനാല് അവരെ നായികാസ്ഥാനത്ത് നിന്ന് മാറ്റുകയാണെന്നും സന്ദീപ് റെഡ്ഡി വ്യക്തമാക്കിയിരുന്നു. ദിവസം എട്ട് മണിക്കൂര് ജോലി സമയം, ഉയര്ന്ന പ്രതിഫലം, ലാഭവിഹിതം തുടങ്ങിയ ഡിമാന്ഡുകളാണ് ദീപിക മുന്നോട്ട് വച്ചത് എന്നാണ് റിപ്പോര്ട്ടുകള്.
തെലുങ്കില് സംഭാഷണം പറയാന് ദീപിക വിസമ്മതിച്ചുവെന്നും റിപ്പോര്ട്ടുകളുണ്ട്. കുഞ്ഞിന് ജന്മം നല്കിയ ശേഷം കുറച്ചു കാലമായി സിനിമയില് നിന്ന് വിട്ടുനില്ക്കുകയായിരുന്ന ദീപിക. നടി ഗര്ഭിണി ആയതിനാല് ആയിരുന്നു സ്പിരിറ്റിന്റെ ചിത്രീകരണം നീണ്ടുപോയത്. എന്നാല് നടിയുടെ ഡിമാന്റുകള് അംഗീകരിക്കാന് ചിത്രത്തിന്റെ ടീമിന് ആയില്ല.
ചിത്രത്തില് തന്നെ നായിക ആക്കിയതില് സന്ദീപിന് നന്ദി അറിയിച്ച് തൃപ്തി രംഗത്തെത്തിയിട്ടുണ്ട്. ”ഇപ്പോഴും ഇതെനിക്ക് പൂര്ണമായി വിശ്വസിക്കാനായിട്ടില്ല. ഈ ഒരു യാത്രയില് എന്നെയും വിശ്വസിച്ച് ഒപ്പം കൂട്ടിയതിന് ഒരുപാട് നന്ദി. താങ്കളുടെ വിഷന്റെ ഭാഗമാകാന് എനിക്ക് അവസരം നല്കിയതിന് സന്ദീപ് റെഡ്ഡി വംഗയോട് ഒരുപാട് നന്ദി” എന്നാണ് തൃപ്തി കുറിച്ചത്.