നടി കങ്കണ റണാവത്തിന്റെ രാഷ്ട്രീയപ്രവേശം സംബന്ധിച്ച വാര്ത്തകളെ പരിഹസിച്ച് ബിജെപി എംപിയും നടിയുമായ ഹേമമാലിനി. ഉത്തര്പ്രദേശിലെ മഥുരയില് നിന്ന് കങ്കണ തിരഞ്ഞെടുപ്പില് മത്സരിക്കുമോ എന്ന ചോദ്യത്തിനായിരുന്നു മഥുര എംപി കൂടിയായ ഹേമമാലിനിയുടെ മറുപടി.
”അത് നല്ലൊരു കാര്യമാണ്. ഞാന് എന്താണ് പറയേണ്ടത്? ഇക്കാര്യത്തില് അഭിപ്രായ പ്രകടനത്തിനില്ല. എല്ലാം ദൈവത്തിന് വിട്ടിരിക്കുകയാണ്. മഥുരയില് എംപിയായി സിനിമാതാരങ്ങളെ തന്നെ വേണം എന്നുണ്ടോ? ഈ നാട്ടുകാരന് എംപിയാകാന് നിങ്ങള് സമ്മതിക്കില്ലെന്നാണോ?”
”അങ്ങനെയെങ്കില് നാളെ രാഖി സാവന്തിന്റെ പേരും ഉയര്ന്നു വന്നേക്കാം”- എന്നാണ് ഹേമമാലിനിയുടെ വാക്കുകള്. 2014 മുതല് മഥുര എംപിയാണ് ഹേമമാലിനി. വരുന്ന തിരഞ്ഞെടുപ്പില് ബിജെപി നേതൃത്വം ഹേമമാലിനിയെ മാറ്റി മഥുരയില് കങ്കണയെ പരീക്ഷിച്ചേക്കുമെന്ന് വാര്ത്തകള് പ്രചരിച്ചിരുന്നു.
കങ്കണ മഥുര വൃന്ദാവനിലെ ക്ഷേത്രം സന്ദര്ശിച്ചതും വാര്ത്തയായിരുന്നു. അതേസമയം, തേജസ്, ടികു വെഡ്സ് ഷേരു, എമര്ജന്സി എന്നിവയാണ് കങ്കണയുടെതായി അണിയറയില് ഒരുങ്ങുന്ന ചിത്രങ്ങള്.