അക്ഷയ് കുമാര്‍ ചിത്രം ‘ഓഎംജി 2’ 100 കോടിയിലേക്ക് കടന്നിരിക്കുകയാണ്. 150 കോടി ബജറ്റില്‍ ഒരുക്കിയ ചിത്രം തിയേറ്ററില്‍ ദുരന്തമാകുന്നു എന്ന റിപ്പോര്‍ട്ടുകള്‍ വരുന്നതിനിടെയാണ് ചിത്രത്തിന്റെ കളക്ഷന്‍ റിപ്പോര്‍ട്ട് പുറത്തുവന്നത്. ചിത്രത്തില്‍ ഒരു രൂപ പോലും പ്രതിഫലം വാങ്ങാതെയാണ് അക്ഷയ് അഭിനയിച്ചത് എന്ന റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്.
”ഓഎംജി 2വിന്ഡറെ ബജറ്റിനെ കുറിച്ചുള്ള റിപ്പോര്‍ട്ടുകള്‍ അതിശയോക്തിപരമാണ്. നേരെ മറിച്ച്, അക്ഷയ് ഒരു രൂപ പോലും പ്രതിഫലം വാങ്ങിയിട്ടില്ല. വാസ്തവത്തില്‍, അത്തരമൊരു ധീരമായ സിനിമയില്‍ ഉള്‍പ്പെട്ടിരിക്കുന്ന സാമ്പത്തികവും ക്രിയാത്മകവുമായ അപകട സാധ്യതകളില്‍ ഞങ്ങള്‍ക്കൊപ്പം നിന്നു.”
”ഓഎംജി , സ്‌പെഷ്യല്‍ 26, ടോയ്ലറ്റ്: ഏക് പ്രേം കഥ മുതല്‍ ഞങ്ങള്‍ അദ്ദേഹവുമായി നല്ല ബന്ധത്തിലാണ്. ക്രിയാത്മകമായും സാമ്പത്തികമായും താരം പൂര്‍ണമായും നിക്ഷേപം നടത്തി” എന്നാണ് ചിത്രത്തിന്റെ വിതരണക്കാരായ വയാകോം 18 സ്റ്റുഡിയോസിന്റെ സിഒഒ അജിത് അന്ധാരെ പറയുന്നത്.
അമിത് റായ് സംവിധാനം ചെയ്ത ചിത്രത്തില്‍ ശിവന്റെ ദൂതനായിട്ടാണ് അക്ഷയ് അഭിനയിച്ചിരിക്കുന്നത്. സെന്‍സര്‍ ബോര്‍ഡിന്റെ നിര്‍ദേശത്തെ തുടര്‍ന്നാണ് ശിവന്‍ ആയി എത്താനിരുന്ന അക്ഷയ് ശിവദൂതനായി എത്തിയത്. 27 കട്ടുകളും സെന്‍സര്‍ ബോര്‍ഡ് നിര്‍ദേശിച്ചിരുന്നു. പങ്കജ് ത്രിപാഠി, യാമി ഗൗതം എന്നിവരാണ് മറ്റ് താരങ്ങള്‍.
ചിത്രത്തിന്റെ റിലീസിന് എതിരെ കഴിഞ്ഞ ദിവസം ആഗ്രയില്‍ പ്രതിഷേധം നടന്നിരുന്നു. രാഷ്ട്രീയ ബജ്റംഗ്ദള്‍ പ്രവര്‍ത്തകര്‍ ശ്രീ ടാക്കീസിന് പുറത്ത് തടിച്ചുകൂടി, സിനിമയുടെ പ്രദര്‍ശനം ഉടന്‍ നിര്‍ത്തിവയ്ക്കണമെന്ന് ആവശ്യപ്പെട്ടു. അക്ഷയ് കുമാറിന്റെ കോലം കത്തിക്കുകയും ചെയ്തിരുന്നു.