സിനിമാ ചിത്രീകരണത്തിനിടെ നടന് അജയ് ദേവ്ഗണിന് പരിക്ക്. രോഹിത് ഷെട്ടി സംവിധാനം ചെയ്യുന്ന ‘സിങ്കം എഗെയ്ന്‍’ എന്ന ചിത്രത്തിന്റെ ഷൂട്ടിംഗിനിടെയാണ് നടന് പരിക്കേറ്റത്. ഡോക്ടര്‍മാര്‍ ലൊക്കേഷനിലെത്തി താരത്തെ പരിശോധിച്ചു എന്നാണ് റിപ്പോര്‍ട്ടുകള്‍.
മുംബൈയിലെ വൈല്‍ പാര്‍ലെയിലെ ഗോള്‍ഡന്‍ ടുബാക്കോ ഫാക്ടറിയില്‍ വച്ച് സിങ്കം എഗെയ്ന്‍ ചിത്രത്തിലെ ഒരു പ്രധാന ആക്ഷന്‍ സീക്വന്‍സ് ചിത്രീകരിക്കവെയാണ് നവംബര്‍ 30ന് നടന്റെ കണ്ണിന് പരിക്കേറ്റത്. ആക്ഷന്‍ രംഗം ചിത്രീകരിക്കുന്നതിനിടെ ഒരു സ്റ്റണ്ട് ആര്‍ടിസ്റ്റിന്റെ പഞ്ച് തെറ്റി അജയ്‌യുടെ മുഖത്ത് കൊണ്ടു.
ഇത് കണ്ണിന് തന്നെയാണ് കൊണ്ടത്. ഡോക്ടര്‍മാര്‍ ഉടന്‍ തന്നെ സ്ഥലത്ത് എത്തി അജയ്‌യെ പരിശോധിച്ചു. പരിക്ക് വലിയ പ്രശ്‌നമില്ലാത്തതിനാല്‍ അജയ് കുറച്ച് വിശ്രമിച്ച ശേഷം അന്ന് തന്നെ ആ സംഘടന രംഗം തീര്‍ത്തു എന്നാണ് മിഡ് ഡേ റിപ്പോര്‍ട്ട് ചെയ്യുന്നത്.
രോഹിത് ഷെട്ടിയുടെ കോപ് യൂണിവേഴ്‌സിലെ ഏറ്റവും പുതിയ ചിത്രമാണ് സിങ്കം എഗെയ്ന്‍. ചിത്രത്തില്‍ ദീപിക പദുക്കോണ്‍ അവതരിപ്പിക്കുന്ന ലേഡി സിങ്കം കൂടി ഉണ്ടാകുമെന്ന് രോഹിത് ഷെട്ടി നേരത്തെ സ്ഥിരീകരിച്ചിരുന്നു.
ടൈഗര്‍ ഷ്രോഫും പൊലീസ് വേഷത്തില്‍ എത്തുന്നുണ്ട്. സൂര്യവംശിയായി അക്ഷയ് കുമാറും ഇന്‍സ്‌പെക്ടര്‍ സിംബയായി രണ്‍വീര്‍ സിംഗും ചിത്രത്തിന്റെ ഭാഗമാകും. ചിത്രത്തിലെ പ്രതിനായകനായി അര്‍ജുന്‍ കപൂര്‍ എത്തിയേക്കും എന്നും റിപ്പോര്‍ട്ടുകളുണ്ട്.