ഷാരൂഖ് ഖാന്റെ ബംഗ്ലാവില്‍ അതിക്രമിച്ച് കയറാന്‍ ശ്രമിച്ച രണ്ടുപേര്‍ പിടിയില്‍. മുെബൈയിലെ മന്നത്തിലാണ് ഗുജറാത്ത് സ്വദേശികളായ രണ്ടു പേര്‍ അതിക്രമിച്ച് കടക്കാന്‍ ശ്രമിച്ചത്. വ്യാഴാഴ്ചയാണ് സംഭവം നടന്നത്. പുറത്തെ മതിലില്‍ അള്ളിപ്പിടിച്ച് മന്നത്തിന്റെ പരിസരത്ത് പ്രവേശിച്ച ശേഷമാണ് സുരക്ഷാ ഗാര്‍ഡുകള്‍ ഇവരെ പിടികൂടുന്നത്.
പിന്നാലെ ഇവരെ പൊലീസില്‍ ഏല്‍പ്പിക്കുകകയായിരുന്നു. 20നും 22നും ഇടയില്‍ പ്രായമുള്ള പുരുഷന്മാരാണ് പിടിയിലായതെന്നും തങ്ങള്‍ ഗുജറാത്തില്‍ നിന്നാണ് വന്നതെന്ന് ഇവര്‍ മൊഴി നല്‍കിയതായും പൊലീസ് പറഞ്ഞു.
‘പഠാന്‍’ താരത്തെ കാണാന്‍ ആഗ്രഹം കൊണ്ടാണ് എത്തിയത് എന്നാണ് പ്രതികള്‍ പൊലീസിനോട് പറഞ്ഞിരിക്കുന്നത്. അതിക്രമിച്ചു കടക്കല്‍ അടക്കമുള്ള വകുപ്പുകള്‍ ചേര്‍ത്ത് ഇവക്കെതിരെ കേസ് എടുത്തതായി പൊലീസ് അറിയിച്ചു. തുടര്‍ പരാജയങ്ങളില്‍ കൂപ്പുകുത്തിയ ബോളിവുഡിനെ കൈപ്പിടിച്ചുയര്‍ത്തിയ ചിത്രമായിരുന്നു ഷാരൂഖിന്റെ പഠാന്‍.
നാല് വര്‍ഷത്തിന് ശേഷം തിയേറ്ററുകളില്‍ എത്തിയ ഷാരൂഖ് ഖാന് ഗംഭീര സ്വീകരണമാണ് ലഭിച്ചത്. ജനുവരി 25 ന് തിയറ്ററുകളില്‍ എത്തിയ ചിത്രം ഇന്ത്യന്‍ കളക്ഷനില്‍ 500 കോടിയും ആഗോള ബോക്‌സോഫീസില്‍ 1000 കോടിയും പിന്നിട്ടിരുന്നു.
