“ഗപ്പി” എന്ന ഏറെ പ്രേക്ഷക പ്രീതി നേടിയ സിനിമക്ക് ശേഷം ജോൺപോൾ ജോർജ് സംവിധാനം ചെയ്യുന്ന സിനിമയാണ് “അമ്പിളി” സൗബിൻ ഷാഹിർ ആണ് സിനിമയിൽ നായകനാകുന്നത്. ചിത്രത്തിൻറെ ഓഡിയോ ലോഞ്ച് ഇന്നലെ കൊച്ചിയിൽ നടന്നു. ചടങ്ങിൽ “ഇത്തവണ കുറച്ചു മാറ്റിയാണ് ചെയ്തിരിക്കുന്നത്. എല്ലാവരും ഇതിനെയും ഒന്ന് രക്ഷപ്പെടുത്തണം’ എന്ന സൗബിന്റെ അപേക്ഷ കയ്യടി നേടി.
സിനിമയിൽ സൗബിന്റെ കഥാപാത്രത്തിന്റെ പേരാണ് അമ്പിളി. “ഒരുപാട് തമാശകൾ നിറഞ്ഞ കുടുംബ ചിത്രം” എന്നാണ് അമ്പിളിയെ കുറിച്ച് അണിയറപ്രവർത്തകർ പറയുന്നത്. നസ്രിയയുടെ സഹോദരൻ നവീൻ നസീം ആദ്യമായി ക്യാമറക്ക് മുന്നിൽ എത്തുന്ന സിനിമ കൂടിയാണ് “അമ്പിളി”. ദേശീയ സൈക്ലിംഗ് ചാമ്പ്യൻ ബോബി കുര്യൻ ആയാണ് നവീൻ സ്ക്രീനിൽ എത്തുന്നത്.
ഒരു യാത്രയുടെ കൂടി കഥയാണ് അമ്പിളി. തമിഴ്നാട്, കര്ണാടക, ഗോവ, മഹാരാഷ്ട്ര, പഞ്ചാബ്, രാജസ്ഥാന്, ഹിമാചല്പ്രദേശ് എന്നീ സംസ്ഥാനങ്ങളിലും കേരളത്തിന്റെ വിവിധ ഭാഗങ്ങളിലും ആയാണ് ആമ്പിയ ചിത്രീകരിച്ചത്. ജാഫര് ഇടുക്കി, വെട്ടുകിളി പ്രകാശ്, നീന കുറുപ്പ്, ശ്രീലത നമ്പൂതിരി, സൂരജ്, ബീഗം റാബിയ എന്നിവരും സിനിമയിലുണ്ട്.ചിത്രത്തിലെ “ജാക്സൺ അല്ലേടാ” എന്ന ഗാനം ശ്രദ്ധിക്കപ്പെട്ടിരുന്നു.
ഓഡിയോ ലോഞ്ചിലെ സൗബിന്റെ നൃത്തവും സോഷ്യൽ മീഡിയയിൽ വൈറൽ ആവുകയാണ്. ചിത്രത്തിൻറെ അണിയറ പ്രവർത്തകർക്കൊപ്പം കുഞ്ചാക്കോ ബോബൻ, ദിലീഷ് പോത്തന്, നസ്രിയ നസീം, തന്വി റാം, ഗ്രേസ് ആന്റണി തുടങ്ങീ നിരവധി താരങ്ങൾ പങ്കെടുത്തു. ചടങ്ങിന് ശേഷം സംഗീതസായാഹ്നം നടന്നു. ബെന്നി ദയാല്, ആന്റണി ദാസന്, സൂരജ് സന്തോഷ്, വിഷ്ണു വിജയ്, മധുവന്തി നാരായണ് എന്നീ പ്രമുഖ ഗായകർ പങ്കെടുത്തു.