ചിതാഭസ്മം ഭക്ഷണത്തിൽ കലർത്തി സഹോദരനും അമ്മയ്ക്കും ‘തമാശയ്ക്ക്’ വിളമ്പി യുവതി. ഓസ്ട്രേലിയയിലാണ് ഈ വിചിത്രമായ സംഭവം നടന്നത്. മുത്തശ്ശിയുടെ ചിതാഭസ്മം സൂക്ഷിച്ചിരുന്ന പാത്രത്തിൽ നിന്ന് യുവതി ചിതാഭസ്മം കഴിക്കുക മാത്രമല്ല, അമ്മയ്ക്കും സഹോദരനും ഭക്ഷണത്തിൽ കലർത്തി നൽകുകയും ചെയ്തു.
മെൽബണിലെ ഒരു ബ്രേക്ക്ഫാസ്റ്റ് ഷോയിൽ ചെയെൻ എന്നു പേരുള്ള ആ സ്ത്രീയാണ് ഇക്കാര്യം തുറന്നു പറഞ്ഞത്.കഴിഞ്ഞ വർഷമാണ് മുത്തശ്ശി മരിച്ചത്. വീട്ടിൽ സൂക്ഷിച്ചിരുന്ന പാത്രത്തിലായിരുന്നു ചിതാഭസ്മം. മുത്തശ്ശിയുടെ വിയോഗത്തിൽ കുടുംബം വിഷമിച്ചിരുന്ന സമയത്ത് അവരുടെ മാനസികസമ്മർദ്ദം കുറയ്ക്കാനും പ്രിയപ്പെട്ടവരെ ആശ്വസിപ്പിക്കാനും ചെയെൻ ശ്രമിച്ചു.
ഇതിനിടെ യുവതി മുത്തശ്ശിയുടെ ചിതാഭസ്മം കാണുകയും അമ്മയ്ക്കും സഹോദരനും ഭക്ഷണത്തിൽ കലർത്തി നൽകുകയുമായിരുന്നു. യുവതി മനഃപൂർവ്വം ചിതാഭസ്മം കഴിക്കാൻ തീരുമാനിക്കുകയും പാസ്ത സോസിൽ കലർത്തി അമ്മയ്ക്കും സഹോദരനും വിളമ്പുകയും ചെയ്തതായാണ് റിപ്പോർട്ടുകൾ. ഇത് ഒരു തമാശയായാണ് യുവതി കണ്ടതെന്നാണ് പറയുന്നത്.
‘അതെ, ഞാൻ അത് തമാശയ്ക്ക് വേണ്ടിയാണ് കഴിച്ചത്. മുത്തശ്ശി എന്നിലൂടെ എന്നും ജീവിക്കും’ എന്നും തത്സമയ റേഡിയോയിലൂടെ യുവതി കൂട്ടിച്ചേർത്തു. ‘ഇത് ഞാൻ ആരോടും പറഞ്ഞിട്ടില്ലാത്ത കാര്യമാണ്. എന്റെ സഹോദരൻ ഈയിടെയാണ് ജയിലിൽ നിന്നും പുറത്തു വന്നത്. അവനെ പറ്റിക്കുന്നത് തമാശയാകും എന്ന് കരുതി. അങ്ങനെ ഞാൻ മുത്തശ്ശിയുടെ ചിതാഭസ്മം കുറച്ചെടുത്ത് പാസ്ത സോസിൽ ചേർത്തു’ എന്നാണ് അവർ പറഞ്ഞത്. അതിൽ എന്തെങ്കിലും ഇനി ബാക്കിയുണ്ടോ എന്ന അവതാരികയുടെ ചോദ്യത്തിന് ഉണ്ടെന്നും ഒരു പെട്ടി നിറയെ ബാക്കിയുണ്ട് എന്നുമായിരുന്നു യുവതിയുടെ മറുപടി.
സമാനരീതിയിൽ ഭർത്താവിൻ്റെ ചിതാഭസ്മം കഴിക്കുന്നതിൽ അടിമപ്പെട്ട ഒരു യുവതിയും വാർത്തകളിൽ വന്നിരുന്നു. 26 കാരിയായ കാസി എന്ന സ്ത്രീ തൻ്റെ ഭർത്താവിൻ്റെ അവശിഷ്ടങ്ങൾ കിടക്കുന്ന പാത്രത്തിൽ പതിവായി വിരൽ മുക്കി നക്കുകയാണ് ചെയ്തിരുന്നത്. മൈ സ്ട്രേഞ്ച് അഡിക്ഷൻ എന്ന റിയാലിറ്റി ടിവി ഷോയിലാണ് തന്റെ വിചിത്രമായ ആസക്തി യുവതി വെളിപ്പെടുത്തിയത്. ഒരു കാർഡ്ബോർഡ് പെട്ടിയിൽ നിന്ന് ഭർത്താവിൻ്റെ സ്മാരക പാത്രത്തിലേക്ക് മാറ്റിയപ്പോഴാണ് കാസി ആദ്യമായി ചിതാഭസ്മം രുചിച്ചത്.