31 കോടി രൂപ വിലമതിക്കുന്ന ഒരു വില്ല വെറും 1000 രൂപയ്ക്ക് നിങ്ങൾക്ക് സ്വന്തമാക്കാൻ സാധിക്കുകയാണെങ്കിലോ? സംഭവം സത്യമാണ്. ധനസമാഹരണ കമ്പനിയായ ഒമേസ് ആണ് പുതിയ ചാരിറ്റി സൂപ്പർ നറുക്കെടുപ്പിൽ ഏറ്റവും വിലപിടിപ്പുള്ള സമ്മാനം പ്രഖ്യാപിച്ചിരിക്കുന്നത്. ഭാഗ്യശാലിക്ക് സ്പെയിനിൽ 3 മില്യൺ പൗണ്ട് (31.61 കോടി രൂപ) വിലയുള്ള ഒരു ആഡംബര വില്ലയാണ് സ്വന്തമാക്കാൻ അവസരം ലഭിക്കുക.
അത്യാധുനിക അടുക്കള, ഫ്ലോർ ടു സീലിംഗ് ഗ്ലാസ് വാതിലുകളുള്ള ഒരു കൺസർവേറ്ററി, സ്വീകരണമുറി, നീന്തൽകുളം ,സെറ ഡി ട്രാമുന്റാന പർവതനിരകളുടെ വിശാലമായ കാഴ്ചകൾ എന്നിവ മല്ലോർക്കയ്ക്ക് സമീപമുള്ള ഈ നാല് കിടപ്പുമുറി വീടിന്റെ സൗകര്യങ്ങളിൽ ഉൾപ്പെടുന്നുണ്ട്.
കൂടാതെ ക്ലാസിക് രീതിയില്‍ കല്ല് പാകിയ ലാന്‍ഡ്സ്കേപ്പ് ചെയ്ത മുറ്റവും ബാര്‍ബിക്യൂ ഏരിയയും പ്രതേകതകളാണ്. താഴത്തെ നിലയില്‍ ഒരു റോൾ-ടോപ്പ് ബാത്തിന് സൗകര്യമുള്ള ഒരു ബെഡ്‌റൂം സ്യൂട്ട്, ഒരു കുളിമുറിയും ഒരു ക്ലോസറ്റും രണ്ട് അധിക കിടപ്പുമുറികളും ഉണ്ട്. അഞ്ച് കാറുകൾ വരെ പാർക്ക് ചെയ്യാവുന്ന കാർ പാർക്കിംഗ് സൗകര്യവും വില്ലയിലുണ്ട്.
മനോഹരമായ ഈ വില്ലയ്ക്ക് മറ്റ് ബാധ്യതകളൊന്നും തന്നെയില്ല. അതേസമയം ഭാഗ്യമുണ്ടെങ്കിൽ വില്ലയ്ക്ക് പുറമേ 2.63 കോടി രൂപയും (250,000 പൗണ്ട്) കൂടി നിങ്ങളെ തേടി എത്തും. ഒരു നറുക്കെടുപ്പിൽ പങ്കെടുക്കണെമെന്ന് മാത്രം. അതിനായുള്ള ടിക്കറ്റിന് 10 പൗണ്ട് (1000 രൂപ) ആണ് ടിക്കറ്റ് നിരക്ക്.
നറുക്കെടുപ്പിൽ വിജയിക്കുന്ന ആൾക്ക് വില്ല സ്വന്തമാക്കാനോ വിൽക്കാനോ സാധിക്കും. നിയമപരമായ കാര്യങ്ങൾ എല്ലാം സംഘാടകർ തന്നെ ചെയ്തു തരും. ഡിമെൻഷ്യ രോഗത്തിനെതിരെ പോരാടുന്ന, ചാരിറ്റി രംഗത്തും ക്ലിനിക്കൽ റിസര്‍ച്ച് രംഗത്തും പ്രവര്‍ത്തിക്കുന്ന അൽഷിമേഴ്‌സ് റിസർച്ച് യുകെയ്‌ക്കായി പണം കണ്ടെത്തുന്നതിനാണ് ആഡംബരവില്ല നറുക്കെടുപ്പിന് വച്ചിരിക്കുന്നത്.
10 പൗണ്ട് നല്‍കി നറുക്കെടുപ്പില്‍ പങ്കെടുക്കുന്ന ആളുകളിൽ നിന്നും ഒരാളെ വിജയിയായി തെരഞ്ഞെടുക്കും. എന്നാൽ നറുക്കെടുപ്പില്‍ പങ്കെടുക്കുന്നയാള്‍ യുകെ പൗരനായിരിക്കണം എന്നതാണ് ഒരേയൊരു നിബന്ധന.