അനുയോജ്യമായ ജീവിത പങ്കാളിയെ മാത്രമല്ല, ഇനി മുതല് മാട്രിമോണിയിലൂടെ വിവാഹത്തിനുള്ള പണവും കണ്ടെത്താം. വിവാഹ ആവശ്യത്തിന് പണം കണ്ടെത്താന് പുതിയ ആപ്പുമായാണ് മാട്രിമോണിഡോട്ട്കോം രംഗത്തെത്തിയിരിക്കുന്നത്. വെഡ്ഡിംഗ് ലോണ് എന്ന വെബ്സൈറ്റിലൂടെ വിവാഹത്തിന് ആവശ്യമായ പണം വായ്പയായി ലഭിക്കുമെന്ന് മാട്രിമോണിഡോട്ട്കോം വ്യക്തമാക്കുന്നു.
വിവാഹ ആവശ്യങ്ങള്ക്കുള്ള പണം വായ്പയായി നല്കുന്ന ധനകാര്യ സ്ഥാപനങ്ങള് നിലവിലുണ്ടെങ്കിലും വിവാഹ ആവശ്യങ്ങള്ക്ക് മാത്രം പണം നല്കുന്ന ഒരു ലോണ് ആപ്പ് ഇതാദ്യമാണ്. ഇത്തരത്തില് ലോണ് നേടുന്നതിന് സിബില് സ്കോര് ഉള്പ്പെടെ എല്ലാവിധ രേഖകളും കൃത്യമായിരുന്നാല് മാത്രം മതിയാകും.
ടാറ്റ ക്യാപിറ്റല്സ്, ഐഡിഎഫ്സി, എല്ആന്ഡ്ടി ഫിനാന്സ്, ടിവിഎസ് ക്രെഡിറ്റ് എന്നീ സ്ഥാപനങ്ങളുടെ സഹകരണത്തോടെയാണ് മാട്രിമോണിഡോട്ട്കോം പദ്ധതിയുമായി രംഗത്തെത്തിയിരിക്കുന്നത്. ലോണ് ആപ്പിലൂടെ 50,000 രൂപ മുതല് പത്ത് ലക്ഷം വരെയാണ് ലോണ് ലഭിക്കുക. രാജ്യത്തെ വിവാഹ മാര്ക്കറ്റ് ലക്ഷ്യം വച്ചാണ് മാട്രിമോണി ഗ്രൂപ്പ് ലോണ് ആപ്പുമായി എത്തിയിരിക്കുന്നത്.
സമാനതകളില്ലാത്ത വിപണിയാണ് ഇന്ത്യയില് വിവാഹത്തിനുള്ളത്. നവംബര് മുതല് ഡിസംബര് പകുതി വരെ നീളുന്ന ഇന്ത്യയിലെ പ്രധാന വിവാഹ സീസണ് ആറു ലക്ഷം കോടി രൂപയുടേതാണെന്നാണ് വിലയിരുത്തലുകള്.