നടപ്പുവര്ഷത്തെ രണ്ടാം പാദ ജിഡിപി കണക്കുകള് പുറത്തുവന്നതോടെ സാമ്പത്തിക വളര്ച്ചാ നിരക്കില് വന് ഇടിവ്. 2024-25 സാമ്പത്തിക വര്ഷത്തിലെ രണ്ടാം പാദത്തില് 5.4 ശതമാനം വളര്ച്ച മാത്രമാണ് ജിഡിപിയ്ക്കുള്ളത്. ജൂലൈ- സെപ്തംബര് പാദത്തില് രേഖപ്പെടുത്തിയ ജിഡിപി വളര്ച്ച കഴിഞ്ഞ രണ്ട് വര്ഷത്തിനിടയിലെ ഏറ്റവും താഴ്ന്ന നിരക്കാണ്. ഈ വര്ഷം ഏഴ് ശതമാനത്തിന് മുകളില് റിസര്വ്വ് ബാങ്ക് അടക്കം വളര്ച്ച പ്രഖ്യാപിച്ച ഇടത്താണ് രണ്ടാം പാദത്തിലെ കൂപ്പുകുത്തല്.
ഇന്ത്യയുടെ മൊത്ത ആഭ്യന്തര ഉല്പാദന (ജിഡിപി) വളര്ച്ചാനിരക്ക് രണ്ട് വര്ഷത്തിനിടയിലെ ഏറ്റവും മോശം വളര്ച്ചയാണ് രേഖപ്പെടുത്തിയിരിക്കുന്നതെന്ന് കേന്ദ്ര സ്റ്റാറ്റിസ്റ്റിക്സ് മന്ത്രാലയം പുറത്തുവിട്ട റിപ്പോര്ട്ട് വ്യക്തമാക്കുന്നു. 2022-23 സാമ്പത്തിക വര്ഷത്തിന്റെ മൂന്നാം പാദത്തില് (2022 ഒക്ടോബര്-ഡിസംബര്) 4.3 ശതമാനം ജിഡിപി വളര്ച്ച രേഖപ്പെടുത്തിയതാണ് ഇതിന് മുമ്പുള്ള ഏറ്റവും താഴ്ന്ന ജിഡിപി വളര്ച്ച നിരക്ക്. 8.1 ശതമാനമായിരുന്നു മുന്വര്ഷത്തെ ഇതേ പാദത്തില് രേഖപ്പെടുത്തിയത്.
ലോകത്തെ ഏറ്റവും വേഗം വളരുന്ന വലിയ സമ്പദ്വ്യവസ്ഥ എന്ന നേട്ടം ഇന്ത്യ കഴിഞ്ഞപാദത്തിലും നിലനിര്ത്തി. അതില് ഒരു കാരണം ചൈനയാണ്. ഈ വര്ഷം ജൂലൈ-സെപ്റ്റംബര് പാദത്തില് ചൈനയുടെ ജിഡിപി വളര്ച്ച 4.6 ശതമാനമായതിനാല് ഇന്ത്യയ്ക്ക് എതിരാളിയായില്ല. അതിനാല് ഇന്ത്യ അതിവേഗം വളരുന്ന പ്രധാന സമ്പദ്വ്യവസ്ഥയായി തുടര്ന്നു.
സാമ്പത്തിക വിദഗ്ദരും ഗവേഷകരും ആറ് ശതമാനത്തിന് മുകളിലാണ് വളര്ച്ച നിരക്ക് അനുമാനിച്ചിരുന്നത്. ഇപ്പോഴുണ്ടായ വന് ഇടിവ് അമ്പരപ്പിക്കുന്നതാണെന്നാണ് പൊതുവേയുള്ള വിലയിരുത്തല്. നടപ്പുവര്ഷം ഏപ്രില്-ജൂണില് 6.7 ശതമാനമായിരുന്നു ജിഡിപി വളര്ച്ച. ലോക്സഭാ തിരഞ്ഞെടുപ്പിന്റെ പശ്ചാത്തലത്തില് കേന്ദ്ര-സംസ്ഥാന സര്ക്കാരുടെ മൂലധനച്ചെലവ് കുറഞ്ഞതും രാജ്യത്ത് സാമ്പത്തിക പ്രവര്ത്തനങ്ങള് മന്ദഗതിയിലായതും ആദ്യ പാദ ജിഡിപി വളര്ച്ചയെ ബാധിച്ചുവെന്നാണ് കരുതപ്പെട്ടിരുന്നത്. എന്നാല് രണ്ടാം പാദത്തില് അതിലും താഴ്ന്ന വളര്ച്ചാ നിരക്ക് വലിയ വെല്ലുവിളി സാമ്പത്തിക മേഖലയില് ഉയര്ത്തുന്നുണ്ട്.