ജെറ്റ് എയർവെയ്‌സ് സർവീസ് നിർത്തി വെച്ചിരിക്കുന്ന സാഹചര്യത്തിലും സ്പൈസ് ജെറ്റ് ആഭ്യന്തര സെക്ടറില്‍ 28 പുതിയ സര്‍വീസുകള്‍ ആരംഭിക്കുന്നു. ജെറ്റ് എയര്‍വേസില്‍ നിന്നും പാട്ടത്തിനെടുത്ത വിമാനങ്ങൾ കൂടി ഉള്‍പ്പെടുത്തിയാകും പുതിയ സര്‍വീസുകള്‍. ഇവയുടെ അറ്റകുറ്റപണികൾ പുരോഗമിച്ചു വരികയാണെന്ന് സ്പൈസ് ജെറ്റ് അറിയിച്ചു. ഏപ്രിൽ 17 നാണ് ജെറ്റ് എയർവേയ്‌സ് സർവീസ് താത്കാലികമായി നിർത്തിയത്.
മുംബൈയില്‍ നിന്നും ദില്ലിയില്‍ നിന്നുമാണ് പുതിയ സര്‍വീസുകള്‍ ആരംഭിക്കുന്നത്. മുംബൈയില്‍ നിന്ന് അമൃതസര്‍, മംഗലാപുരം, കോയമ്പത്തൂര്‍ എന്നിവടങ്ങളിലേക്കും അവിടുന്ന് തിരിച്ചുമാണ് സര്‍വീസ്. ദില്ലിയില്‍ നിന്ന് മുംബൈയിലേക്കും ബാംഗ്ലൂരിലേക്കുമാണ് സര്‍വീസ്. ഏപ്രില്‍ 26 മുതല്‍ പുതിയ സര്‍വീസുകള്‍ക്ക് തുടക്കമാകും. 14 വിമാനങ്ങള്‍ മുംബൈ കേന്ദ്രീകരിച്ചും എട്ട് വിമാനങ്ങള്‍ ദില്ലി കേന്ദ്രീകരിച്ചും സര്‍വീസ് ആരംഭിക്കും. ദില്ലി- മുംബൈ- ദില്ലി മേഖലയില്‍ സര്‍വീസുകള്‍ വർധിപ്പിക്കുമെന്നും സ്പൈസ് ജെറ്റ് അധികൃതർ വ്യക്തമാക്കി.
ഇതിനു പുറമെ ഹോങ്കോങ്, ദുബായ് , ജിദ്ദ, ധാക്ക, കൊളംബോ, റിയാദ്, ബാങ്കോക് എന്നീ നഗരങ്ങളിലേക്ക് പുതിയ സർവീസ് ആരംഭിക്കുമെന്നും കമ്പനി അറിയിച്ചു. മെയ് മാസം മുതൽ മുംബയിൽ നിന്നാണ് പുതിയ രാജ്യാന്തര സർവീസുകൾ തുടങ്ങുക.
സ്പൈസ് ജെറ്റ്, ഇൻഡിഗോ തുടങ്ങിയ വിമാന കമ്പനികൾക്ക് പുതിയ വിമാനങ്ങൾ വാങ്ങാനുള്ള പദ്ധതിയുമുണ്ട്. അടുത്ത ആറ് വർഷത്തിനകം 430 പുതിയ വിമാനങ്ങൾ വാങ്ങാനാണ് ഇൻഡിഗോ പദ്ധതിയിടുന്നത്. സ്പൈസ് ജെറ്റ് 23 വിമാനങ്ങൾ കൂടി വാങ്ങുമെന്ന് അറിയിച്ചിട്ടുണ്ട്.