ആര്‍ വണ്‍ ഫൈവിന്റെ മൂന്നാം തലമുറക്കാരനെ ഇന്ത്യയില്‍ അവതരിപ്പിക്കാനുള്ള ഒരുക്കത്തിലായിരുന്നു ജാപ്പനീസ് വാഹന നിര്‍മ്മാതാക്കളായ യമഹ. നാളുകള്‍ക്ക് മുമ്പെ രാജ്യാന്തര വിപണികളില്‍ അവതരിപ്പിച്ച പുത്തന്‍ ആര്‍ വണ്‍ ഫൈവിനെ കുറിച്ച് ഉപഭോക്താക്കള്‍ നല്‍കിയ മികവുറ്റ അഭിപ്രായങ്ങള്‍ ഇന്ത്യന്‍ ആരാധകരുടെ പ്രതീക്ഷയെ വാനോളമുയര്‍ത്തിയിട്ടുണ്ട്. ഇപ്പോഴിതാ കാത്തിരിപ്പിന് വിരാമമിട്ട് ആര്‍ വണ്‍ ഫൈവ് വി3 യുടെ ബുക്കിംഗ് യമഹ ആരംഭിച്ചു. അടുത്ത മാസം പുതിയ വാഹനം വിപണിയിലെത്തിക്കും.
5000 രൂപ അഡ്വാന്‍സ് നല്‍കി പുതിയ മോഡല്‍ ബുക്ക് ചെയ്യാം. വില നിയന്ത്രിക്കുന്നതിന് വേണ്ടി ഇന്ത്യന്‍ പതിപ്പില്‍ ഒരു പിടി ഘടകങ്ങള്‍ ഒഴിവാക്കിയിട്ടുണ്ട്. പുറത്ത് വന്ന ചിത്രങ്ങള്‍ പ്രകാരം ഇന്ത്യന്‍ പതിപ്പില്‍ അപ്‌സൈഡ്-ഡൗണ്‍ ഫോര്‍ക്കുകള്‍ ഇടംപിടിച്ചിട്ടില്ല. ഇതിന് പകരം നിലവിലുള്ള ടെലിസ്‌കോപിക് ഫോര്‍ക്കുകളാണ് ഘടിപ്പിച്ചിരിക്കുന്നത്. പുതുക്കിയ സ്‌പോര്‍ട്ടി ഫെന്‍ഡറോട് കൂടിയുള്ളതാണ് ആര്‍ വണ്‍ ഫൈവിന്റെ രാജ്യാന്തര പതിപ്പ്. ഇന്ത്യന്‍ വരവില്‍ സ്ലിപ്പര്‍ ക്ലച്ചും പുതിയ മോഡലിന് നഷ്ടപ്പെടും. ഡിസൈന്‍ മുഖത്ത് ഏറെ അഗ്രസീവായാണ് പുതിയ ആര്‍ വണ്‍ ഫൈ കാണപ്പെടുന്നത്.
പുത്തന്‍ 155.1 സിസി ലിക്വിഡ്-കൂള്‍ഡ്, സിംഗിള്‍ സിലിണ്ടര്‍ എഞ്ചിനാണ് പുതിയ മോഡലിന്റെ പ്രധാന ഹൈലൈറ്റ്. 19.04 ബിഎച്ചിപി കരുത്തും 14.7 എന്‍എം ടോര്‍ക്കും ഉത്പാദിപ്പിക്കുന്ന എഞ്ചിനില്‍ 6 സ്പീഡ് ഗിയര്‍ബോക്‌സാണ് ഒരുങ്ങുന്നത്. എഞ്ചിന്‍ മുഖത്ത് രാജ്യാന്തര പതിപ്പുകള്‍ക്ക് സമമാണ് ഇന്ത്യന്‍ പതിപ്പും. പ്രീമിയം ഘടകങ്ങളായ യുഎസ്ഡി ഫോര്‍ക്കുകളുടെയും, സ്ലിപ്പര്‍ ക്ലച്ചിന്റെയും അഭാവത്തില്‍ പുതിയ ആര്‍ വണ്‍ ഫൈവിന്റെ വില നിയന്ത്രിച്ച് നിര്‍ത്തുകയാണ് യമഹയുടെ ലക്ഷ്യം.