ചൈനീസ് കാര് നിര്മാണ കമ്പനിയായ സെയ്ക്കിന്റെ ഉടമസ്ഥതയിലുള്ള എംജി മോട്ടോഴ്സ് ഇന്ത്യയുടെ ഭൂരിഭാഗം ഓഹരികളും വില്ക്കുന്നു. ഇന്ത്യയില് രണ്ടാംഘട്ട വികസനത്തിന് മാതൃകമ്പനിയില് നിന്ന് കൂടുതല് ഫണ്ടെത്തിക്കാന് സാധിക്കാത്തതിനാലാണ് ഓഹരികള് വില്ക്കുന്നത്. എംജിയുടെ ഓഹരികള് റിലയന്സ് ഗ്രൂപ്പ് വാങ്ങിക്കാന് ശ്രമിക്കുന്നുണ്ടെന്ന് ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
2020ലെ ഇന്ത്യാ-ചൈന അതിര്ത്തി സംഘര്ഷത്തെ തുടര്ന്ന് ചൈനയില് നിന്നുള്ള നിക്ഷേപത്തില് കേന്ദ്ര സര്ക്കാര് നിയന്ത്രണം കൊണ്ടുവന്നു. ഇതാണ് എംജി മോട്ടോഴ്സിന് തിരിച്ചടിയായത്. ചൈനയുമായി ബന്ധമുള്ള കമ്പനിയായതിനാല് പുതിയ നിക്ഷേപത്തിന് കേന്ദ്രസര്ക്കാരിന്റെ പ്രത്യേക അനുമതി ആവശ്യമാണ്. അതിനാലാണ് ഇന്ത്യയില് നിന്നും പങ്കാളികളെ കണ്ടെത്താന് എംജി മോട്ടോഴ്സ് ശ്രമിക്കുന്നത്.
നിശ്ചിത ഓഹരികള് വില്ക്കാനും ഇന്ത്യയില് 5,000 കോടി രൂപയുടെ അധിക നിക്ഷേപം നടത്താനുമാണ് കമ്പനി നീക്കം നടത്തുന്നത്. മുകേഷ് അംബാനി നയിക്കുന്ന റിലയന്സ് ഇന്ഡസ്ട്രീസ്, രാജ്യത്തെ ഏറ്റവും വലിയ ടൂവീലര് നിര്മ്മാണക്കമ്പനിയായ ഹീറോ മോട്ടോകോര്പ്പ്, പ്രേംജി ഇന്വെസ്റ്റ്, ജെ.എസ്.ഡബ്ള്യു ഗ്രൂപ്പ് എന്നിവയുമായി എം.ജി മോട്ടോര് ഓഹരി പങ്കാളിത്വത്തിനായി ചര്ച്ചകള് നടത്തിയിട്ടുണ്ട്. റിലയന്സുമായുള്ള ചര്ച്ചകളാണ് അതിവേഗം മുന്നോട്ട് പോയിരിക്കുന്നത്. ഓഹരിവില്പന സംബന്ധിച്ച ധാരണാപത്രം ഈ വര്ഷം തന്നെ ഉണ്ടാകുമെന്നും റിപ്പോര്ട്ടുകളുണ്ട്.
2028നകം ഇന്ത്യന് പങ്കാളിക്ക് ഭൂരിഭാഗം (മെജോറിറ്റി) ഓഹരികള് വിറ്റഴിച്ച് 5,000 കോടി രൂപ സമാഹരിക്കാനാണ് എം.ജി ലക്ഷ്യമിടുന്നത്. ഇന്ത്യയില് കൂടുതല് വികസനപദ്ധതികള്ക്കായി ഈ തുക വിനിയോഗിക്കും. നിലവില് ജനറല് മോട്ടോഴ്സില് നിന്ന് ഏറ്റെടുത്ത ഗുജറാത്തിലെ ഹാലോല് പ്ലാന്റില് നിന്നാണ് എം.ജി വാഹനങ്ങള് പുറത്തിറക്കുന്നത്. 1.2 ലക്ഷം വാഹനങ്ങളാണ് പ്ലാന്റിന്റെ വാര്ഷിക ഉത്പാദനശേഷി. ഇത് ഇപ്പോള് മൂന്നുലക്ഷം ആക്കാനുള്ള ശ്രമങ്ങള് എംജി തുടങ്ങി കഴിഞ്ഞു. ഇന്ത്യയില് ഒരോവര്ഷവും 4-5 പുത്തന് മോഡലുകള് അവതരിപ്പിക്കുകയാണ് എം.ജിയുടെ ലക്ഷ്യമിടുന്നത്. 2028ല് മൊത്തം വില്പനയില് 65-75 ശതമാനം വൈദ്യുത വാഹനങ്ങളാക്കാനുമാണ് കമ്പനിയുടെ ശ്രമം.
ഇതോടെ ജീവനക്കാരുടെ എണ്ണം 20,000 കവിയും.