ബൈക്കിന് മൈലേജ് തീരെയില്ലെന്ന ബെംഗളുരു സ്വദേശിയുടെ പരാതിയില്‍ ഹീറോമോട്ടോര്‍കോപ്പ് മുഴുവന്‍ പണവും പരാതിക്കാരന് തിരിച്ചുനല്‍കണമെന്ന് ഉപഭോക്തൃപരിഹാര കോടതി വിധിച്ചു. 2013 ലാണ് കെംപിഗൗഡ സ്വദേശിയായ മജ്ഞുനാഥ് ഹീറോയുടെ ഏറ്റവും പുതിയ മോഡലായ ഇഗ്നിറ്റോര്‍ വാങ്ങുന്നത്. 74796 രൂപ നല്‍കിയായിരുന്നു മജ്ഞുനാഥ് ബൈക്ക് വാങ്ങിയത
വില്പന സമയത്ത് ബൈക്കിന് മണിക്കൂറില്‍ 60 കിലോമീറ്റര്‍ മൈലേജ് ലഭിക്കുമെന്ന് സെയ്ല്‍സ്മാനും കമ്പനി പരസ്യങ്ങളും വാഗ്ദാനം നല്‍കിയിരുന്നു. എന്നാല്‍ പതിനൊന്ന് മാസം ഉപയോഗിച്ചിട്ടും ബൈക്കിന് പരമാവധി 35 കീലോമീറ്റര്‍ മാത്രമെ മൈലേജ് ലഭിക്കുന്നുള്ളുവെന്ന് മജ്ഞുനാഥ് പറയുന്നു. ഔട്ട്‌ലെറ്റില്‍ പരാതിപ്പെട്ടപ്പോള്‍ രണ്ടാമത്തെ സര്‍വ്വീസില്‍ പ്രശ്‌നത്തിന് പരിഹാരം ഉണ്ടാവുമെന്ന് പറഞ്ഞിരുന്നു. എന്നിട്ടും ബൈക്കിന്റെ പ്രകടനത്തില്‍ മികവ് ഇല്ലാത്തതിനാലാണ് നേരിട്ട് കണ്‍സ്യൂമര്‍ കോടതിയെ സമീപിച്ചതെന്നും മജ്ഞുനാഥ് പറയുന്നു.
നാല് വര്‍ഷത്തെ വാദങ്ങള്‍ക്കൊടുവിലാണ് ഇപ്പോള്‍ കേസില്‍ കണ്‍സ്യൂമര്‍ കോടതി വിധി പ്രസ്താവിക്കുന്നത്. ഹീറോ കമ്പനി വാഹനത്തിന്റെ ഉടമസ്ഥന് ഡ്രൈവിംഗ് വശമില്ലാത്തതിനാലാണ് പരാതി ഉന്നയിക്കുന്നതെന്ന് വാദിക്കാന്‍ ശ്രമിച്ചിരുന്നെങ്കിലും പരാജയപ്പെടുകയായിരുന്നു. മജ്ഞുനാഥിന്റെ പരാതിയില്‍ കഴമ്പുണ്ടെന്ന് മനസ്സിലാക്കിയ കോടതി വാഹനം വാങ്ങിയപ്പോള്‍ നല്‍കിയ തുക മുഴുവനും,ഒപ്പം കോടതിച്ചെലവിലേക്കായി 10000 രൂപയും നല്‍കാന്‍ ഉത്തരവിടുകയായിരുന്നു.