ഇന്ത്യയുടെ ഓട്ടോമൊബൈൽ മേഖലയ്ക്ക്, പ്രത്യേകിച്ചും കഴിഞ്ഞ കുറച്ച് മാസങ്ങളായി പ്രതിസന്ധിയുടെ നാളുകളാണ്, പക്ഷേ ഭാവിയിലെ വളർച്ചയ്ക്കുള്ള സാദ്ധ്യത കണക്കിലെടുത്ത് അയൽരാജ്യമായ ചൈനയിൽ നിന്ന് ഒന്നിന് പുറകെ മറ്റൊന്നായി വാഹന കമ്പനികൾ ഇന്ത്യൻ വിപണിയെ ലക്ഷ്യമിടുകയാണ്. ഏറ്റവും പുതിയതായി ചൈനയിലെ ഏറ്റവും വലിയ എസ്‌യുവി നിർമ്മാതാക്കളായ ഗ്രേറ്റ് വാൾ മോട്ടോഴ്‌സാണ് ഇന്ത്യൻ വിപണിയിൽ കണ്ണുവെയ്ക്കുന്നത്.
ഗ്രേറ്റ് വാൾ മോട്ടോഴ്സ് ഇതിനോടകം ഒരു ഇന്ത്യ യൂണിറ്റ് രജിസ്റ്റർ ചെയ്തിട്ടുണ്ട്, കൂടാതെ അതിന്റെ നിർമ്മാണശാലക്കായി ഒന്നിലധികം സ്ഥലങ്ങൾ പരിശോധിച്ചു വരികയാണ്. വ്യവസായ മന്ത്രാലയ വൃത്തങ്ങൾ പറയുന്നതനുസരിച്ച് കമ്പനി ഈ വർഷം ആദ്യം ഗുഡ്ഗാവിൽ ഹവാൽ മോട്ടോർ ഇന്ത്യ എന്ന സ്ഥാപനം രജിസ്റ്റർ ചെയ്തിട്ടുണ്ട്.
ഗ്രേറ്റ് വാൾ മോട്ടോഴ്‌സിന്റെ എസ്‌യുവികൾ വിൽക്കുന്ന ബ്രാൻഡാണ് ഹവാൽ, തങ്ങളുടെ ജനപ്രിയ മോഡലുകളായ ഹവാൽ എച്ച് 2, ഹവാൽ എച്ച് 6, ഹവാൽ എച്ച് 9 എന്നിവ ഉപയോഗിച്ച് ആഭ്യന്തര വിപണിയിൽ പ്രവേശിക്കാമെന്നാണ് കമ്പനി കരുതുന്നത്. ഇന്ത്യൻ വിപണി ലക്ഷ്യമിടുന്ന ആദ്യത്തെ ഓട്ടോമൊബൈൽ കമ്പനിയല്ല ഗ്രേറ്റ് വാൾ. ചൈനയിലെ ഗ്രേറ്റ് വാളിന്റെ എതിരാളികളിലൊരാളായ എസ്‌എഐ‌സി മോട്ടോറും അവരുടെ എം‌ജി മോട്ടോർ ബ്രാൻഡ് കഴിഞ്ഞ വർഷം ഇന്ത്യൻ വിപണിയിൽ പ്രവേശിപ്പിച്ചിരുന്നു.
രണ്ട് സ്ഥാപനങ്ങളും നിലവിൽ ഒരു ഉത്പാദന കേന്ദ്രത്തിനായുള്ള അന്വേഷണത്തിലാണ്, ഈ ഉത്പാദന കേന്ദ്രങ്ങളിലൊന്ന് മഹാരാഷ്ട്രയിലെ തലേഗാവിൽ ഉള്ള യു.എസ് ഓട്ടോ നിർമ്മാതാക്കളായ ജനറൽ മോട്ടോഴ്‌സിന്റെ അവസാനത്തെ ഫാക്ടറിയാണ്. കുറച്ച് വർഷങ്ങൾക്ക് മുമ്പ് ഇന്ത്യയിൽ നിന്ന് പുറത്തു കടക്കുമെന്ന് പ്രഖ്യാപിച്ച ജനറൽ മോട്ടോഴ്സ് അതിന്റെ ഉത്പാദന കേന്ദ്രങ്ങൾ വിൽക്കാനുള്ള ഒരുക്കത്തിലാണ്.
യുഎസ് വാഹന നിർമ്മാതാവ് 2017- ൽ ഗുജറാത്തിലെ ഹാലോളിലുള്ള പ്ലാന്റ് എസ്‌എഐ‌സിക്ക് വിറ്റിരുന്നു, കഴിഞ്ഞ ഏതാനും പാദങ്ങളിൽ ഗണ്യമായ വിൽപ്പന വളർച്ച രേഖപ്പെടുത്തിയ ഇന്ത്യയിലെ പാസഞ്ചർ വെഹിക്കിൾ വിഭാഗത്തിലെ ഒരേയൊരു മോഡലുകളിൽ ഒന്നായ എം‌ജി മോട്ടോഴ്സ് എസ്‌യുവി ഹെക്ടർ നിർമ്മിക്കാനാണ് എസ്‌എഐ‌സി ഈ സൗകര്യം ഉപയോഗിച്ചത്.
ഉത്പാദന കേന്ദ്രത്തിനായുള്ള ഗ്രേറ്റ് വാളിന്റെ അന്വേഷണം തലേഗാവിൽ മാത്രമായി പരിമിതപ്പെടുത്തുന്നില്ല. കഴിഞ്ഞ കുറച്ച് മാസങ്ങളായി കമ്പനിയിൽ നിന്നുള്ള സംഘം ഗുജറാത്ത്, കർണാടക, ആന്ധ്രാപ്രദേശ്, തമിഴ്‌നാട് തുടങ്ങി നിരവധി സംസ്ഥാനങ്ങളിൽ വ്യാപകമായി സ്ഥലങ്ങൾ പരിശോധിച്ചിരുന്നു. മഹാരാഷ്ട്രയിലെ ചക്കനിൽ ചൈനീസ് ട്രക്ക് നിർമ്മാതാക്കളായ ഫോട്ടന്റെ ഉടമസ്ഥതയിലുള്ള ഭൂമി ഏറ്റെടുക്കുന്നതിനെ കുറിച്ചും അന്വേഷിച്ചിരുന്നു.