തങ്ങളുടെ R 1300 GS ഇന്ത്യൻ വിപണിയിൽ അവതരിപ്പിച്ച് ബിഎംഡബ്ല്യു മോട്ടോറാഡ് ഇന്ത്യ. നിർമാതാക്കളുടെ ഏറ്റവും പുതിയ മുൻനിര മോട്ടോർസൈക്കിളാണിത്. 20.95 ലക്ഷം രൂപയാണ് ഇതിൻ്റെ പ്രാരംഭ എക്സ്ഷോറൂം വില. 1250 ജിഎസിനേക്കാൾ 40,000 രൂപ കൂടുതലാണ് മോഡലിന്. പുതിയ ADV-യുടെ ബുക്കിംഗ് ആരംഭിച്ചു കഴിഞ്ഞു. ഡെലിവറികൾ ഉടൻ ആരംഭിക്കും.
R 1300 GS മൊത്തം നാല് വേരിയൻ്റുകളിലായാണ് ബിഎംഡബ്ല്യു വാഗ്ദാനം ചെയ്യുന്നത്. സ്റ്റാൻഡേർഡ്, ട്രിപ്പിൾ ബ്ലാക്ക്, ജിഎസ് ട്രോഫി, ഓപ്ഷൻ 719 ട്രമുൻ്റാന എന്നീ വേരിയന്റുകളിലായാണ് എത്തുക. ഇന്ത്യയിൽ, R 1300 GS ൻ്റെ എല്ലാ വകഭേദങ്ങളും ക്രോസ്-സ്പോക്ക്ഡ് വീലുകളോടെയാണ് വാഗ്ദാനം ചെയ്യുന്നത് എന്നതാണ് ശ്രദ്ധിക്കേണ്ട ഒരു പ്രധാന കാര്യം. അതേസമയം ആഗോള വിപണിയിൽ മോട്ടോർസൈക്കിൾ അലോയ് വീലുകളിലും സ്പോക്ക് വീലുകളിലും ലഭ്യമാണ്.
ഇന്ത്യൻ വിപണിയിൽ സ്റ്റാൻഡേർഡായി കുറച്ച് ഫീച്ചറുകൾ ലഭിക്കും. ഉദാഹരണത്തിന്, ഇലക്ട്രിക്കലി അഡ്ജസ്റ്റ് ചെയ്യാവുന്ന വിൻഡ്സ്ക്രീൻ, സെൻ്റർ സ്റ്റാൻഡ്, ബൈ-ഡയറക്ഷണൽ ക്വിക്ക്ഷിഫ്റ്റർ, പ്രോ റൈഡിംഗ് മോഡുകൾ, എൽഇഡി മാട്രിക്സ് ഹെഡ്ലാമ്പ്, ടിഎഫ്ടി സ്ക്രീൻ, കീലെസ് ഗോ എന്നിവയും അതിലേറെയും ഉള്ളതാണ് ഇന്ത്യ-സ്പെക് മോട്ടോർസൈക്കിളുകൾ. ഉപഭോക്താക്കൾക്ക് ഒന്നിലധികം എൽഇഡികളും കോർണറിംഗ് ഫംഗ്ഷനുകളും പ്രവർത്തനക്ഷമമാക്കുന്ന ‘ഹെഡ്ലൈറ്റ് പ്രോ’ ഓപ്ഷനും തിരഞ്ഞെടുക്കാം.
ബിഎംഡബ്ള്യു R 1300 GS ട്രിപ്പിൾ ബ്ലാക്ക്
ട്രിപ്പിൾ ബ്ലാക്ക് ഓപ്ഷൻ ബ്ലാക്ക്ഡ്-ഔട്ട് കളർ സ്കീമിലാണ് വരുന്നത്. ഫീച്ചറുകളുടെ കാര്യമെടുക്കുകയാണെങ്കിൽ ഒരു ലഗേജ് കാരിയർ, കംഫർട്ട് സീറ്റുകൾ, കംഫർട്ട് പാസഞ്ചർ ഫുട്പെഗുകൾ, ഒരു സെൻ്റർ സ്റ്റാൻഡ്, ഓപ്ഷണൽ അഡാപ്റ്റീവ് ഹൈറ്റ് കൺട്രോൾ എന്നിവ ഈ മോഡലിൽ ലഭിക്കും.
ബിഎംഡബ്ള്യു R 1300 GS ട്രോഫി
ബിഎംഡബ്ല്യുവിൻ്റെ ലിവറി ലഭിക്കുന്ന മോഡലാണ് ബിഎംഡബ്ള്യു R 1300 GS ട്രോഫി. സ്പോർട്ട് പാസഞ്ചർ സീറ്റും ഇന്ധന ടാങ്കിലേക്ക് എത്തുന്ന സീറ്റ് കവറും ഉള്ള ഉയർന്ന സീറ്റ് ഹൈറ്റ് ഇതിന് ലഭിക്കുന്നു. ഒരു ഓഫ്-റോഡ് പതിപ്പായതിനാൽ റേഡിയേറ്റർ ഗാർഡുകളും സ്വർണ്ണ നിറത്തിലുള്ള ക്രോസ്-സ്പോക്ക്ഡ് വീലുകളും ഇതിലുണ്ടാകും.
ബിഎംഡബ്ല്യു ആർ 1300 ജിഎസ് 719 ട്രമുൻ്റാന
മെയിൻ, റിയർ ഫ്രെയിമുകൾ, പവർട്രെയിൻ, ഗ്രാബ് ഹാൻഡിൽ ഉള്ള ലഗേജ് കാരിയർ എന്നിങ്ങനെ കറുപ്പും സ്വർണ നിറത്തോടുകൂടിയതുമായ ക്രോസ്-സ്പോക്ക് വീലുകളുമായാണ് ബിഎംഡബ്ല്യു ആർ 1300 ജിഎസ് 719 ട്രമുൻ്റാന വരുന്നത്. ഹാൻഡിൽബാർ സ്വർണ്ണ നിറത്തിലാണ് തീർത്തിരിക്കുന്നത്. ചിലത് ഔറേലിയസ് ഗ്രീൻ മെറ്റാലിക് നിറത്തിലാണ് ഒരുക്കിയിരിക്കുന്നത്.
ബിഎംഡബ്ല്യു R 1300 GS സവിശേഷതകൾ
1,300 സിസി ബോക്സർ എഞ്ചിൻ 7,750 ആർപിഎമ്മിൽ 143 ബിഎച്ച്പി പരമാവധി കരുത്തും 6,500 ആർപിഎമ്മിൽ 149 എൻഎം പരമാവധി ടോർക്കും പുറപ്പെടുവിക്കുന്നു. ഗിയർബോക്സ് 6 സ്പീഡ് യൂണിറ്റാണ്. റൈഡിംഗ് മോഡുകൾ, ഹിൽ സ്റ്റാർട്ട് അസിസ്റ്റ്, ഡൈനാമിക് ബ്രേക്ക് കൺട്രോൾ, എഞ്ചിൻ ഡ്രാഗ് കൺട്രോൾ തുടങ്ങി നിരവധി ഫീച്ചറുകൾ ഓഫറിൽ ലഭ്യമാണ്.