ഐപിഎല്ലില്‍ ശ്രേയസ് അയ്യര്‍ക്കായി വല വിരിച്ച് മുന്‍ ചാമ്പ്യന്മാരായ കൊല്‍ക്കത്ത നൈറ്റ് റൈഡേഴ്‌സ്. താരത്തെ കൊണ്ടുവന്ന് നായക സ്ഥാനത്ത് അവരോധിക്കാനാണ് കെകെആറിന്റെ നീക്കം. നേരത്തെ പുറത്തുവന്ന റിപ്പോര്‍ട്ടുകള്‍ പ്രകാരം അഹമ്മദാബാദ് ഫ്രാഞ്ചൈസിയുമായി ശ്രേയസ് അയ്യര്‍ ധാരണയിലെത്തിയെന്നായിരുന്നു. എന്നാല്‍ ഏറ്റവും പുതിയ റിപ്പോര്‍ട്ടുകള്‍ പ്രകാരം താരം കൈകൈആറിലേക്കെന്നാണ്.
ആന്ദ്രെ റസല്‍,സുനില്‍ നരെയ്ന്‍, വെങ്കടേഷ് അയ്യര്‍, വരുണ്‍ ചക്രവര്‍ത്തി എന്നിവരെയാണ് കെകെആര്‍ നിലനിര്‍ത്തിയിരിക്കുന്ന താരങ്ങള്‍. ഇവരില്‍ നായകസ്ഥാനത്തേക്ക് പരിഗണിക്കാന്‍ കഴിയുന്ന ആരുമില്ല. അതുകൊണ്ട് തന്നെ ശ്രേയസിനെ കൊണ്ടുവരാനാണ് കെകെആര്‍ മാനേജ്മെന്റ് ആലോചിക്കുന്നത്.
അഹമ്മാദാബാദ് ഫ്രാഞ്ചൈസിയുടെ ക്യാപ്റ്റനായി മുംബൈ ഇന്ത്യന്‍സ് ഒഴിവാക്കിയ ഹര്‍ദിക് പാണ്ഡ്യ എത്തുമെന്ന റിപ്പോര്‍ട്ട് ശ്രേയസ് കെകെആറിലേക്കെന്ന സാദ്ധ്യതയെ വര്‍ദ്ധിപ്പിക്കുന്നു. പുതിയൊരു ടീമിന്റെ നായകസ്ഥാനം ഏറ്റെടുത്ത് ടീമിനെ മികച്ച നിലയിലേക്കെത്തിക്കുക എന്നത് ശ്രമകരമായ കാര്യമായതിനാല്‍ ഇന്ത്യയുടെ ഭാവിനായകനായി കരുതപ്പെടുന്ന ശ്രേയസ് ആ സാഹസത്തിന് മുതിര്‍ന്നേക്കില്ല.
15ാം സീസണിന് മുന്നോടിയായുള്ള താരലേലം ഫെബ്രുവരി 12,13 തിയതികളില്‍ ബംഗളൂരുവില്‍ നടക്കും. മെഗാ താരലേലം താരസമ്പന്നമാണെന്നതിനാല്‍ തന്നെ വാശിയേറിയ പോരാട്ടം തന്നെ പ്രതീക്ഷിക്കാം.